Сонсгол хамгаалах дэлхийн өдөр тохиож байна

МОНГОЛЫН МЭДЭЭ | ЭРҮҮЛ МЭНД
boloroo8136@gmail.com
2023-03-03 08:06:18

Улаанбаатар /МОНЦАМЭ/. Жил бүрийн 3 дугаар сарын 3-ны өдрийг ДЭМБ-аас “Сонсгол хамгаалах дэлхийн өдөр” хэмээн зарлаж, олон улсад тэмдэглэн өнгөрүүлэхийг уриалдаг. 

 

ДЭМБ-ын мэдээлснээр, дэлхийд сонсгол бууралт, дүлийрэлтэй 466 сая хүн байгаагийн 34 сая нь хүүхэд байна. Урьдчилсан тооцоогоор сонсгол бууралт, дүлийрэлтийн тоо 2030 онд 630 сая, 2050 онд 900 саяд хүрэхээр байгаа аж.

 

Сонсгол бууралтын 60 орчим хувийг урьдчилан сэргийлж, эрт оношлох боломжтой. Хүүхдийн сонсгол муудалтын 60 хувь сэргийлж болох шалтгаанаар үүсдэг байна. 

Орчин үеийн техник технологижсон байдал, хүүхэд залуусын чихэвчний зохисгүй, хэтэрсэн хэрэглээ, осол гэмтэл, чих хамар хоолойн үрэвсэлт өвчин, эм тарианы буруу хэрэглээ, гаж нөлөө зэрэг олон шалтгааны улмаас сонсгол бууралт, сонсгол алдалтын тоо нэмэгдэж байна. 15-35 насны залуучууд хөгжим, чихэвч, зугаа цэнгээний газрын хэт чанга дуу, шуугианаас болж сонсгол алдах эрсдэлд орох нь элбэг байна.

 

Сонсголын бэрхшээлтэй иргэдтэй чанга дуугаар, хашхирч харилцаж болохгүй. Тэдний өөдөөс нүүр тулан харж, амны хөдөлгөөнөө харуулан үгийг удаан, зөөж, зөөлөн ярих хэрэгтэйг эмч нар зөвлөлөө.  

Related news