Ulaanbaatar
Мялзан төст өвчний үеийн өдөр тутмын бэлэн байдлыг цуцаллаа
ОРОН НУТГИЙН МЭДЭЭ | ХОВД
Ховд аймгийн хэмжээнд бог малын мялзан төст өвчний вакцинжуулалтад 7881 өрхийн 2969200 толгой малыг хамруулах ажил 95,2 хувьтай байна.
Одоогийн байдлаар Булган сумын Баянсудал багийн 10 суурьт вакцинжуулалт хийж байна. Сумдад вакцинжуулалтын ажлыг яаралтай зохион байгуулж 88 ажлын хэсэг ажиллалаа. Вакцинжуулалт ийнхүү дуусч байгаа учраас аймгийн онцгой комисс өнөөдөр хуралдаж, өдөр тутмын бэлэн байдлыг хязгаарлалтын дэглэмд шилжүүлэн 19 постоос 15 постыг татан буулгалаа.
Харин Жаргалант сумын 4 постыг хэвээр үлдээж, иргэдийн хүнсний аюулгүй байдлыг хангах үүднээс үйл ажиллагааг нь улам чангатгасан байна. Мялзан төст өвчний вакцин хийлгэсэн малын махыг 21 хоногийн хугацаанд хүнсэнд хэрэглэхийг хориглосон олон улсын эрүүл мэндийн байгууллагын заавар байдаг. Өөрөөр хэлбэл мялзан төст өвчний вакцин хийлгэсэн малын махыг хүнсэнд хэрэглэх нь хүний эрүүл мэндэд хортой гэсэн үг. Иймээс ард иргэд та бүхэнд вакцин хийлгэснээс хойш 21 хоногийн дараа бог малын махыг хүнсэнд хэрэглэж өөрийнхөө болон бусдын эрүүл мэндэд анхаарах хэрэгтэйг мэргэжлийн байгууллагууд зөвлөж байна.
А.Бямбасүрэн
