Ulaanbaatar
Өсвөрийн цагдаа бүлгэмийн хүүхдүүд тангарагаа өргөлөө
ОРОН НУТГИЙН МЭДЭЭ | СҮХБААТАРСүхбаатар аймгийн цагдаагийн газраас ЕБС болон МСҮТ-ийн ахлах ангийн сурагчдын дунд өсвөрийн цагдаа бүлгэмийг ажиллуулдаг. Үүний хүрээнд Сүхбаатар аймгийн МСҮТ-ийн 14 суралцагч өсвөрийн цагдаа бүлгэмийн тангараг өргөж, үнэмлэхээ гардан авлаа.
Өсвөр насны хүүхдүүдийг гэмт хэргээс урьдчилан сэргийлэх, буруу үйлдлээс зайлсхийхэд туслах, үе тэнгийнхэндээ зөв үлгэр дууриалал үзүүлэх нь эдгээр хүүхдүүдийн гол зорилго. Мөн тэд аймгийн цагдаагийн газар болон ХГБХХ-тэй хамтран ажиллаж мэдээлэл солилцон хамтран ажиллах юм.
Сүүлийн жилүүдэд өсвөр насны хүүхдүүд гэмт хэрэгт холбогдох, нэг нэгэндээ уруу татагдаж буруу хазгай зүйл хийх, нөгөөтэйгүүр сургуулийн орчиндоо хүүхдүүд дээрэмдүүлэх, хулгайд эд зүйлээ алдах байдал нэмэгдэх хандлагатай байгааг тангараг өргөх ёслолын үеэр Цагдаагийн газрын хүүхдийн байцаагч Б.Ариунтуяа онцоллоо. Тиймээс эдгээр өсвөрийн цагдаа нар энэ бүхний эсрэг сэрэмжлүүлэх ажлыг өөр өөрсдийн сургууль дээр явуулах юм.
Т. Одончимэг
