Кибер аюулгүй байдлын талаар туршлага солилцоно

МОНГОЛЫН МЭДЭЭ | НИЙГЭМ
oyundelger@montsame.gov.mn
2025-08-29 09:01:34

Улаанбаатар, 2025 оны наймдугаар сарын 29 /МОНЦАМЭ/. Олон улсын “Ази номхон далайн бүсийн кибер сургуулилалт-2025”-ыг есдүгээр сарын 2-5-нд Улаанбаатар хотод зохион байгуулна.


Кибер аюулгүй байдлын сургалт, хуралд бүс нутгийн 16 орны кибер аюулгүй байдлыг хангах байгууллагын 40 гаруй төлөөлөл оролцож, кибер халдлага, зөрчлийн сүүлийн үеийн чиг хандлага, түүний бодлого төлөвлөлт, хэрэгжилтийг сайжруулах шийдлийг хэлэлцэн санал солилцох, шинээр гарч ирж буй кибер халдлага, зөрчлийг илрүүлэх хариу арга хэмжээний талаар туршлага солилцоно. 


Энэхүү сургуулилалт нь кибер халдлага, зөрчилтэй тэмцэх төвүүд, бусад салбарын мэргэжлийн байгууллагын кибер халдлагад хариу үзүүлэх хүний нөөцийг чадавхжуулах, кибер аюулгүй байдлын бэлэн байдлыг хангах, хамгаалалтыг сайжруулах, гадаад хамтын ажиллагааг өргөжүүлж, бүс нутгийн орнуудтай туршлага солилцох ач холбогдолтой юм.


Манай улс Кибер аюулгүй байдлын тухай хуулийг 2021 онд баталснаар кибер орчин дахь мэдээллийн аюулгүй байдлыг хангах эрх зүйн орчин бүрдсэн. Улмаар кибер аюулгүй байдлыг хангах, уялдуулан зохицуулах, хэрэгжилтийг зохион байгуулах, мэдээлэл солилцох чиг үүрэг бүхий Кибер аюулгүй байдлын зөвлөлийг 2023 онд байгуулж, Зөвлөлийг Ерөнхий сайд Г.Занданшатар тэргүүлж, дэд даргаар ЦХИХХ-ны сайд Э.Батшугар ажиллаж байна.

 

関連ニュース