СЭЛЭНГЭ: Аймгийн 2025-2026 оны өвөл, хаврын бэлчээрийн даацыг тодорхойлжээ

ОРОН НУТГИЙН МЭДЭЭ | СЭЛЭНГЭ
otgontsetseg@montsame.mn
2025-08-30 12:11:58

Сүхбаатар, 2025 оны наймдугаар сарын 30 /МОНЦАМЭ/. Сэлэнгэ аймгийн 2025-2026 оны өвөл, хаврын бэлчээрийн даацыг тодорхойлсон байна. Энэхүү тооцооллыг Монгол Улсын Засгийн газрын 286 дугаар тогтоолын дагуу Ус цаг уур, орчны судалгаа, мэдээллийн хүрээлэнд 2025-2026 оны өвөл, хаврын бэлчээрийн даацыг баг бүрийн бэлчээрийн ургац, малын тоо, бэлчээрийн талбайн хэмжээ, бэлчээр ашиглах хугацаа зэрэг мэдээлэл дээр үндэслэн багийн нутгаар тооцоолжээ. Тооцооллоор аймгийн хэмжээнд зуншлага 8 дугаар сарын 20-ны байдлаар нийт нутгийн 30 хувьд хэвийн сайн, 70 хувьд дунд зэрэг байсан байна. Өөрөөр хэлбэл, нутгийн 56.3 хувьд нь мал өвөлжилт, хаваржилт хэвийн, 43.7 хувьд  бэлчээрийн боломж муу байгаа юм. Тиймээс  өөр нутагт отор нүүдэл хийх, нэмэгдэл тэжээл бэлтгэх, малын тоог бууруулах зэргээр өвөлжилт, хаваржилтын ажлыг эртнээс анхаарах шаардлага урган гарч байна. 


Бэлчээрийн даацыг сум тус бүрээр авч үзвэл, 5 хувьд нь 50 хүртэлх хувийн бэлчээрийн нөөцтэй, 51.3 хувьд 51-100 хувь бэлчээр хүрэлцээтэй, 26.9 хувьд 101-300 хувь бэлчээрийн даац 1-3 дахин хэтэрсэн, 6.8 хувьд 301-500 хувь даац 3-5 дахин хэтэрсэн, 10 хувьд 500 хувиас их буюу даац олон дахин хэтэрчээ. Тухайлбал, Зүүнбүрэн сумын Жаргалант, Шаамар сумын Охиндий,  Орхон сумын Орхон, Сайхан сумын Номгон, Баянгол сумын Баян, Алтанбулаг сумын Суварга, Бүргэдэй, Цагааннуур сумын Оргих, Орхонтуул сумын Хонгоровоо, Баянцогт, Хушаат сумын Даагат, Хүдэр сумын Баянцагаан, Ерөө сумын Тавин, Жавхлант сумын Бумбат багийн нутгаар бэлчээрийн даац 1-3 дахин байна. Цагааннуур сумын Тийрэг, Сүхбаатар сумын Боргүвээ, Орхон сумын Бэлэндалай, Баянгол сумын Хараа, Шаамар сумын Дулаанхаан багийн нутгаар  бэлчээрийн даац 3-5 дахин буюу улбар шар түвшинд хүрчээ. Цагааннуур сумын Хуурч, Зүүнбүрэн сумын Бэлчир,  Жавхлант сумын Моностой, Баянгол сумын Гонир, Сайхан сумын Гавшгай, Мандал сумын Баянсуудал, Төмөрзам, Ширхэнцэг, Хэрх багийн нутгаар даац олон дахин хэтэрсэн үзүүлэлттэй байгаа юм. 


Энэ жил зуншлага оройтсон, ихэнх сумын нутгаар гандуу болон гантай байсан нь энэ үзүүлэлтэд нөлөөлсөн гэж албаны хүмүүс хэлж байна. Тиймээс бэлчээрийн даац хэтэрсэн сумдад зохицуулалт хийх арга хэмжээг цаг алдалгүй авч, өөрсдийн дотоод нөөц бололцоон дээр тулгуурлан оновчтой, шуурхай зохион байгуулахыг сумдад зөвлөлөө. 

関連ニュース