Ulaanbaatar
Төсвийн мөнгөөр шинэ жил, байгууллага болон салбарын ой тэмдэглэхгүй байхыг үүрэг болгов
МОНГОЛЫН МЭДЭЭ | УЛС ТӨР
Улаанбаатар, 2025 оны арванхоёрдугаар сарын 10 /МОНЦАМЭ/. Засгийн газрын өнөөдрийн хуралдаанаас төсвийн хөрөнгөөр шинэ жил, байгууллага болон салбарын ой тэмдэглэхгүй байхыг үүрэг болгож, төсвийн ерөнхийлөн захирагч болон аймаг, нийслэлийн Засаг дарга нарт дараах үүрэг даалгаврыг өглөө. Үүнд,
-Монгол Улсын 2025 оны нэгдсэн төсвийн орлогын гүйцэтгэлтэй
уялдуулж төсвийг хуваарилан зарцуулахдаа үр ашиггүй, тэвчиж болох зардлыг
танах, хэмнэлтийн горимыг чанд мөрдөн ажиллах талаар харьяа байгууллагын
удирдлагад үүрэг өгч, үр дүнг тооцож ажиллах;
-Төрийн байгууллагын үндсэн цалин, нэмэгдэл, нэмэгдэл хөлс,
нийгмийн болон эрүүл мэндийн даатгалын шимтгэл, нийгмийн даатгалын болон
нийгмийн халамжийн бүх төрлийн тэтгэвэр тэтгэмж, хүүгийн төлбөр, хүүхдийн
мөнгө, эмнэлэг, сургууль, хүүхдийн цэцэрлэг, онцгой байдлын байгууллагын
шаардлагатай урсгал зардлыг тэргүүн ээлжид, бусад зардлыг санхүү, төсвийн
асуудал эрхэлсэн төрийн захиргааны төв байгууллагаас тогтоосон эрэмбийн дагуу
санхүүжүүлэx;
-Төрийн хэмнэлтийн тухай хуулийг чанд мөрдөж, бэлэг дурсгалын зүйл бэлтгэхгүй байх;
-Тэвчиж болох зардлын санхүүжилтийг 2025
он дуустал хугацаанд зогсоож, хэрэгжүүлэх үйл ажиллагааг хэмнэлттэй, үр ашигтай
байдлаар зохион байгуулах;
-Хуралт, семинар, сургалтыг цахимаар зохион байгуулж, дотоод гадаад томилолт, тээвэр шатахуун, зочин төлөөлөгч хүлээн авах зардлыг хэмнэх,
байгууллагын дотоод журмаар олгодог нэг удаагийн тэтгэмж, урамшууллыг түр
зогсоох, тавилга, эд хогшил, тоног төхөөрөмж, бичиг хэргийн зүйлс худалдан
авахгүй байх, гуравдагч этгээдээр гүйцэтгүүлэх мэргэжлийн үйлчилгээний гэрээ
шинээр гэрээ байгуулахгүй байх, төрийн байгууллагын хэрэгжүүлдэг хөтөлбөрийн санхүүжилтийг дараагийн төсвийн жилд шилжүүлэхийг үүрэг
болгов.
Мөн уул уурхайн бүтээгдэхүүний экспортоос нэмэлт орлого
төвлөрүүлэх боломжийг судлах, иргэд, аж ахуйн нэгжүүдэд
хүндрэл үүсгэлгүй зөвлөн туслах байдлаар татварын өр төлбөрийг барагдуулах зэрэг арга хэмжээ авч хэрэгжүүлэхийг албан
тушаалтнуудад даалгалаа.
