“Би эндээс явахгүй” жүжгийг УДЭТ-ын тайзнаа дахин толилуулна

МОНГОЛЫН МЭДЭЭ | СОЁЛ УРЛАГ
boloroo8136@gmail.com
2018-10-10 13:11:04

Улаанбаатар /МОНЦАМЭ/. Монголын театрын нэрт төлөөлөгч зохиолч, найруулагч, нийгэм соёлын нэрт зүтгэлтэн Төрийн шагналт, Ардын жүжигчин Э.Оюуны 100 жилийн ойд зориулсан “Би эндээс явахгүй” уянгын драмын жүжгийг УДЭТ-ын уран бүтээлчид энэ сарын 12,13,14-нд үзэгчдэд өргөн барихаар боллоо.


Төрийн шагналт, Ардын жүжигчин Э.Оюун 1956 онд С.Нинжбадгартай хамтран бичсэн эл бүтээлийг 1959 онд Ардын жүжигчин Б.Лоовойгийн найруулгаар тайзны бүтээл болгон жүжгийн гол дүр Дорлигт жүжигчин А.Цэрэндэндэв, Дулмаад Ардын жүжигчин Ч.Долгорсүрэн, Сэржмаад Ардын жүжигчин Т.Хандсүрэн нар тоглож байжээ.

Харин энэ удаад УДЭТ-ын ерөнхий найруулагч, Төрийн соёрхолт Н.Наранбаатарын найруулгаар Дорлигт СТА, жүжигчин О.Гэрэлсүх, Т.Сэргэлэн, Дулмаад СТА, жүжигчин Н.Баярмаа, Б.Одгэрэл, Сэржмаад СТА жүжигчин Б.Одончимэг, Ц.Аззаяа нар тоглох юм. 

Мэс заслын сайн эмч Дорлиг гэргий Дулмаагийн хамтаар аз жаргалтай сайхан амьдарч байна. Гэвч тэрбээр нэг эмнэлэгт хамт ажилладаг бага эмч Сэржмаатай сэтгэлийн нууц холбоотой болсноор түүний амьдралын ээдрээт үе эхэлнэ. Итгэж хайрлаж байсан хань нь сэтгэл урвасанд гомдсон Дулмаа бүсгүй эр нөхөртөө хэлж амжаагүй нууцаа хадгалсаар түүнийг орхин явахаас өөр аргагүйд хүрэв. Он цаг, жил сар улиран өнгөрсөөр хэдийнэ арав гаруй жил өнгөрсөн ч хувь тавилан нэг л өдөр Дорлиг, Дулмаа хоёрыг дахин уулзуулах учиртай байжээ. Гэвч тэр үед …...“Би эндээс явахгүй” жүжгийн үйл явдал ийнхүү өрнөдөг.

Хүн бүхий л амьдралынхаа туршид ямар нэгэн “сонголт”-ыг алхам бүртээ хийдэг боловч ямар ч тохиолдолд гэр бүл, ариун нандин хайр сэтгэл, үр хүүхдүүдийнхээ өмнө хариуцлагатай эцэг эх байх эрхэм үүргээ хэзээд юугаар ч сольж болохгүй гэдгийг энэхүү жүжгээр харуулахыг зорьжээ.

Жүжгийн тасалбар нь 10, 15, 20 мянган төгрөгийн үнэтэй байх юм.

Холбоотой мэдээ