Улаанбаатар /МОНЦАМЭ/. УИХ-ын дарга Г.Занданшатар Авлигатай тэмцэх газар /АТГ/-ын удирдлагуудтай өнөөдөр уулзаж, ажилтай нь танилцлаа.

АТГ-ын бүтэц, ажлын өнөөгийн байдал, цаашид анхаарах асуудлын талаар тус газрын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү танилцуулав.

Тус газрыг 2007 онд байгуулж, авлигын эсрэг олон нийтийг соён гэгээрүүлэх, авлигаас урьдчилан сэргийлэх, авлигын гэмт хэргийг илрүүлэхэд чиглэн ажилладаг. Мөн хуульд зааснаар, төрийн алба хаагчдын хөрөнгө, орлогын мэдүүлгийг хянан шалгах чиг үүргийг хэрэгжүүлж байна. АТГ-ын бүтэц, орон тоог УИХ тогтоодог бөгөөд өдгөө үндсэн 5 хэлтэс, Авлигатай тэмцэх үндэсний хөтөлбөрийг хэрэгжүүлэх ажлын албатайгаар ажиллаж байна.

Эрхэлсэн комиссар Т.Баярхүү эрх зүйн зохицуулалтыг боловсронгуй болгох талаар хэд хэдэн санал танилцуулав. Тухайлбал, Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах саналтай байгаагаа хэлэв. Мөн Эрүүгийн хууль, Эрүүгийн хэрэг хянан шийдвэрлэх тухай хуулинд мөн өөрчлөлт хэрэгтэй байгааг тайлбарлав. Мөн тэрээр, иргэдээс гомдол ихээр ирэх болж, мөрдөн шалгах хэлтсийн мөрдөгчийн шалгах хэрэг нэмэгдсэн, ачаалал эрс нэмэгдэж байгааг дуулгав. Тиймээс тус хэлтсийн орон тоо өөрчлөгдөхгүй, хэвээр байгааг уламжлав.

АТГ-ын дарга, тэргүүн комиссар З.Дашдаваа өнөөдрийн байдлаар 41.000 орчим төрийн албан хаагчийн Хөрөнгө, орлогын мэдүүлгийг хянаж, авлигын 400 гаруй гэмт хэргийг мөрдөж байна гэв. Тэрээр, Авлигын эсрэг үндэсний хөтөлбөрийг хэрэгжүүлж, нийгэм, иргэдийн шударга ёсны хүлээлтэд нийцэж ажиллахыг манай хамт олон үндсэн зорилгоо болгож байна хэмээн онцлов. Мөн авлигын гэмт хэргийн нөхцөл амаргүй байгаа ч бид төрийн өмнө хүлээсэн үүргээ бүрэн хэрэгжүүлж ажиллах болно гэлээ.

УИХ-ын дарга Г.Занданшатар нийгмийн тэгш бус байдал газар авч, шударга ёсны төлөөх иргэдийн хүсэл эрмэлзэл эрчээ авч байгаа нь зөвхөн Монгол төдийгүй дэлхий дахиныг хамарсан үйл явц болж байна. Авлигаас ангижрах, урьдчилан сэргийлэх, албан тушаалтны авлигын гэмт хэрэг, түүний дотор олны анхаарал татсан томоохон хэргүүдийг шударгаар шийдвэрлэх, төрд итгэх иргэдийн итгэлийг сэргээх ажилд мэдэгдэхүйц ахиц дэвшил гаргаж чадна гэдэгт та бүхэнд итгэж байна гэлээ. Түүнчлэн авлига авсныг илрүүлж шийтгэхээс илүү, өмнө урьдчилан сэргийлэх ажил та бүхний гол зорилго. Тиймээс соён гэгээрүүлэх ажилд онцгой анхаарах шаардлагатай гэж онцоллоо. Тэрбээр АТГ-ыг тогтвортой, үр дүнтэй байлгах, ажилтнуудын хараат бусаар ажил үүргээ гүйцэтгэх нөхцөлийг хангах, хууль эрх зүйн орчныг боловсронгуй болгох чиглэлээр УИХ дэмжиж ажиллах болно гэв.

УИХ-ын дарга Г.Занданшатар шинээр боловсруулж буй “Төрийн албаны ёс зүй, сахилга хариуцлагын тухай” хуулийн төсөл, “УИХ-ын гишүүний ёс зүйн дүрэм”-ийн төслийг тус газрынханд өгөөд, “Төрийн албан хаагчдын ёс зүй ямар байх ёстой, хэрхэн зөрчигддөг, яаж сэргийлбэл зохилтойг хамгийн сайн мэдэх хүмүүс бол та нар. Тиймээс хуулийн төсөлд саналыг тань авахаар тусгайлан өгч байгаа юм. Хэлэлцэж, санал бодлоо нэгтгээд, ойрын үед УИХ-д ирүүлэх хэрэгтэй” гэсэн үүрэг даалгавар өгөв. Түүнчлэн нэмэлт, өөрчлөлт оруулах хэрэгтэй гэж үзэж байгаа хуулийн зүйл, заалтын талаарх саналаа УИХ-ын Тамгын газарт хүргүүлэхийг даалгав.

УИХ-ын даргыг АТГ-ын үйл ажиллагаатай танилцахад УИХ-ын Тамгын газрын Ерөнхий нарийн бичгийн дарга Л.Өлзийсайхан болон албаны бусад хүмүүс оролцлоо.