Си Жиньпин Осака хотод хүрэлцэн иржээ

Дэлхийд | Улс төр
ayanzaya@montsame.gov.mn
2019-06-27 13:58:49

ОСАКА. /TASS/. Энэ сарын 28-29-нд болох “Их-20” бүлгийн дээд хэмжээний уулзалтад оролцохоор БНХАУ-ын дарга Си Жиньпин Японы Осака хотод хүрэлцэн иржээ.  


Осака хотод БНХАУ-ын дарга хэд хэдэн удаа хоёр талт уулзалт хийж, тэр дундаа Японы Ерөнхий сайд Абэ Шинзо, АНУ-ын Ерөнхийлөгч Дональд Трамп нартай уулзах юм. АНУ, Хятадын удирдагчид яриа хэлэлцээ хийх үеэрээ худалдааны маргаантай холбоотой асуудалд гол анхаарлаа хандуулна.  


Осака хотод болох уулзалтад бэлтгэх хүрээнд АНУ-ын Худалдааны төлөөлөгч Роберт Лайтхайзер, Сангийн сайд Стивен Мнучин, БНХАУ-ын Төрийн Зөвлөлийн Шадар сайд Лю Хэ нар зөвөлгөөн хийхээр төлөвлөж байгаа аж. Си Жиньпин, Д.Трамп нарын уулзалт хоёр улсын харилцан итгэлцлийг гүнзгийрүүлэхэд тус болно гэж үзэж байгаагаа БНХАУ-ын Гадаад хэргийн яам мэдэгдсэн байна.


“Орос-Энэтхэг-Хятад” уулзалтын хүрээнд БНХАУ-ын дарга мөн ОХУ-ын Ерөнхийлөгч Владимир Путин, Энэтхэгийн Ерөнхий сайд Нарендра Мод нартай уулзаж, БРИКС-ийн гишүүн орнуудын удирдагчдын уулзалтад оролцох юм. 

Холбоотой мэдээ