Австралийн сурагчид уур амьсгалын өөрчлөлттэй тэмцэхийг уриалжээ

ДЭЛХИЙН МЭДЭЭ | БАЙГАЛЬ ОРЧИН
khulan@montsame.gov.mn
2019-09-20 13:48:32

КАНБЕРРА. /CNBC/. Ирэх долоо хоногт Нью-Йорк хотноо НҮБ-ын Уур амьсгалын өөрчлөлтийн асуудлаарх дээд хэмжээний уулзалт болох гэж буйтай холбогдуулан Австралийн олон мянган сурагч уур амьсгалын өөрчлөлтийн эсрэг жагсаалд оролцохын тулд өнөөдрийн хичээлээ тасалжээ.


Шведийн уур амьсгалын өөрчлөлтийн эсрэг тэмцэгч, идэвхтэн охин Грета Тунбергээс урам зориг авсан сурагчид Австрали даяар 100 гаруй жагсаал цуглаан өрнүүлж байна. Цагдаагийн ажилтнуудын тооцоолсноор, Сидней хотын төвд болж буй жагсаалд 50 мянга орчим хүн оролцож байгаа ажээ.


Сиднейн жагсагчид нүүрс зэрэг шатах ашигт малтмалын хэрэглээг нэн түрүүнд зогсоохыг шаардаж байгаа бөгөөд энэ төрлийн түүхий эд Австралийн эрчим хүчний үйлдвэрлэлийн 40 орчим хувийг хангадаг байна.


“Бид нүүрстөрөгчийн ялгарлыг тэг болгож, нүүрсний олборлолтыг бүрмөсөн зогсоох хэрэгтэй байна” гэж 13 настай охин хэлжээ. Сургуулийн сурагчдыг дэмжихээр эцэг эхчүүд, оффисын ажилтнууд, үйлдвэрчний эвлэлийн гишүүд ч мөн жагсаал цуглаанд оролцож байгаа ажээ.


Өнгөрсөн гуравдугаар сард Австрали даяар өрнөсөн уур амьсгалын өөрчлөлтийн эсрэг жагсаалд 150 мянга гаруй хүн оролцож байсан бол энэ удаа жагсагчдын тоо улам нэмэгджээ. 

Холбоотой мэдээ