Улаанбаатар
Монгол Улсын Шинжлэх ухааны нэгэн зууны түүхээр ном бүтээнэ
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. Монгол Улсад орчин цагийн шинжлэх ухааны байгууллагыг үүсгэн байгуулсны 100, Шинжлэх ухааны Академийг байгуулсны 60 жилийн ой ирэх жил тохионо.
XX зууны монголчуудын дэвшил хөгжлийн түүхийн томоохон амжилт нь орчин үеийн
шинжлэх ухааны байгууллагыг үүсгэн хөгжүүлсэн явдал юм.
Энэхүү түүхэн ойг хэрхэн тэмдэглэх тухай Монгол Улсын
ШУА-ийн Тэргүүлэгчид өнөөдөр хуралдаж хэд хэдэн асуудлыг хэлэлцэж баталлаа.
Тус
хурлаар Монгол Улсад Шинжлэх ухааны байгууллага Судар бичгийн хүрээлэнг
байгуулсны 100, Шинжлэх ухааны академийн 60 жилийн ойг
тохиолдуулан Монгол Улсын орчин цагийн шинжлэх ухааны
хөгжлийн асуудлыг судалж, нэгтгэн дүгнэх ажлыг Засгийн газрын
түвшинд шийдвэр гарган, зохион байгуулж ажиллах хэрэгтэй гэдэгт гишүүд санал
нэгдэв.
Мөн ойг
тэмдэглэхдээ зөвхөн 100 жилд болсон түүхэн үйл явдлыг үнэлж дүгнэх бус
Монголын эрдэм ухааны өв сан эрдэм шинжилгээний байгууллагын түүхэн уламжлалыг
Эзэнт гүрний түүхээс эхлэн нарийвчлан судлах шаардлагатайг хөндөж ярилцсан юм.
Түүнчлэн
ойн хүрээнд Монгол Улсын Шинжлэх ухааны 100 жилийн түүхийг багтаасан
5 боть ном бүтээхээр төлөвлөжээ. “Энэхүү бүтээлд Монгол Улсад орчин
цагийн шинжлэх ухааны байгууллага үүсэж хөгжсөн үйл явцыг голлон тусгах
хэрэгтэй. Ингэхдээ үндэсний болон олон улсын түвшинд шинжлэх ухааны ямар
салбаруудад тодорхой хувь нэмэр оруулсан, олон улсын түвшинд гүйцэтгэсэн үүрэг,
эзэлж байгаа байр суурийг шинжлэн дүгнэж нэгтгэсэн томоохон хэмжээний
бүтээл байх ёстой” хэмээн тэргүүлэгч гишүүд үзлээ.
Мөн
хурлаар ШУА-ийн харьяа зарим хүрээлэнгүүдийн Эрдмийн зөвлөлийн бүрэлдэхүүнийг
шинэчлэн батлах асуудлыг хэлэлцэж Хими, химийн технологийн хүрээлэн, Газарзүй,
гео-экологийн хүрээлэн, Хэл зохиолын хүрээлэн, Философийн хүрээлэн, Олон улсын
харилцааны хүрээлэнгүүдийн Эрдмийн зөвлөлийн бүрэлдэхүүнийг шинэчлэн батлав.
