Улаанбаатар
Үерийн улмаас 3548 айл өрх гэрэл цахилгаангүй байна
ОРОН НУТГИЙН МЭДЭЭ | ХЭНТИЙ
Хэнтий /МОНЦАМЭ/ Энэ сарын 24-ний өдөр 1 цаг 10 минут орчим үргэлжилсэн 44 мм-ийн зузаантай хур тунадас орсны улмаас Хэрлэн сумын нийт нутгийн 80 хувь нь усанд автжээ.
Улмаар Чингис хотын үерийн усны далан 8-9 газраар сэтэрч, 149 айл өрх, 15 аж ахуйн нэгж, байгууллага, 9 орон сууцны подвал
усанд автаж, 7 автомашин шаварт сууж, 3548 айл өрх гэрэл цахилгаангүй байна. Чингис хотын 1000 өрхийн 4000 гаруй иргэн усанд автсан байдалтай байна.
Монгол Улсын Ерөнхий сайдын өгсөн үүрэг даалгаврын дагуу ОБЕГ-ын дарга,
хошууч генерал Т.Бадрал Хэнтий аймагт
ажиллалаа. Үүссэн нөхцөл байдалтай холбогдуулан 10 тн ариутгалын бодис, 3 бохирын машин, ариутгалын 2
машин, шуурхай албаны пургон автомашин, завийг Хэнтий аймагт ажиллуулахаар болжээ. Мөн ОБЕГ-аас Хэнтий аймагт эрсдэлийн үнэлгээ хийх баг маргаашнаас
ажиллаж эхлэх юм байна. Одоогийн байдлаар Үндэсний
аврах бригад, Багануур дүүрэг, Бэрх, Бор-Өндөр Аврах ангийн онцгой
байдлын алба хаагчдын 100
гаруй хүний бүрэлдэхүүн ажиллаж байна.
