Улаанбаатар
Японд суралцах 50 оюутан батламжаа гардав
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. Боловсрол, шинжлэх ухааны яамны харьяа “Инженер, технологийн дээд боловсрол” төслийн дэмжлэгээр Япон Улсад суралцах болзол хангасан Коосэн хөтөлбөрийн 34, Бакалаврын хамтарсан хөтөлбөрийн 16, нийт 50 оюутанд батламж гардууллаа.
Болзол хангасан оюутнууд жил бүрийн 4 дүгээр сараас эхлэн тус улсад суралцдаг уламжлалтай. Энэ оны хувьд дэлхий нийтэд тархаад буй цар тахалтай холбоотой тогтоосон хөл хорионы улмаас оюутнуудын Япон улс руу явах хугацаа хойшлогдож, 4 дүгээр сараас эхлэн өнөөг хүртэл цахимаар хичээллэж байв. Тэд Монгол Улсын Онцгой комиссын шийдвэрийн дагуу 2020 оны 10 дугаар сарын 10-ны өдрийн тусгай нислэгээр арлын орныг зорих юм.
“Инженер, технологийн дээд боловсрол” төсөл нь Монгол Улсад
өндөр мэдлэг, ур чадвар бүхий инженер, технологийн мэргэжилтэн бэлтгэх,
өрсөлдөх чадварыг нэмэгдүүлэх, боловсон хүчний нөөцийг бэхжүүлэх, сургалтын
орчин, чанарыг шинэчлэн сайжруулах зорилгоор сургалт, судалгааны үйл ажиллагааг
2014 оноос эхлэн өдгөө 6 дахь жилдээ амжилттай хэрэгжүүлж байна. Батламжаа гардсан 50 оюутан бүгд инженерийн чиглэлээр 2-2,5 жил суралцаж
төгсөөд эх орондоо эргэн ирж мэргэжлээрээ 5 жил ажиллах болзолтой тус улсыг зорьж байгаа юм.
2020 оны эхний хагас жилийн байдлаар нийт 670 оюутан, судлаач багш нар төслийн хөтөлбөрүүдэд хамрагдсан нь суралцуулах зорилтот 1000 инженерийн 67 хувийг эзэлж байна.
Батламж гардуулах ёслолд Боловсрол, шинжлэх ухааны дэд сайд Г.Ганбаяр, ЖАЙКА-гийн Монгол дахь төлөөлөгчийн газрын дарга Тамура Эрико, Шинжлэх Ухаан Технологийн их сургуулийн захирал, удирдлагууд болон эцэг, эхчүүд оролцож, оюутнууддаа баяр хүргэж, амжилт хүслээ.
