Анхдугаар хуралдаан түр завсарлаад байна
ОРОН НУТГИЙН МЭДЭЭ | УВСУвс /МОНЦАМЭ/. Аймгийн ИТХ-ын 8 дахь удаагийн сонгуулийн анхдугаар
хуралдаан өнөөдөр болж байна. Орон нутгийн 8 цаг 30 минутаас хурал
эхлэх товтой байсан ч хуралдааны танхимд 5 бие даагч л цагтаа ирсэн юм. Хоёр
цагийн дараа МАН-ын 17 төлөөлөгч, түүнээс 30 минутын дараа АН-ын 19 төлөөлөгч
хүрэлцэн ирснээр хурлын ирц 100 хувь бүрдэж, аймгийн Сонгуулийн хорооноос
мэдээлэл хийн төлөөлөгч нарын бүрэн эрхийг баталгаажууллаа. Анхдугаар
хуралдааныг төлөөлөгч нараас хамгийн өндөр настай нь болох АН-аас сонгогдсон
Б.Цэцээ удирдаж байна.
Одоогоор хуралдаан 14 цаг 30 минут хүртэл түр завсарлага аваад байна. Энэ удаагийн аймгийн ИТХ-д АН, МАН гэсэн хоёр намаас гадна бие даагчид олноор орж ирсэн тул асуудлыг шийдвэрлэхэд амаргүй байна. Иймээс хэлэлцээрийн ширээний ард сууцгаая гэсэн саналыг гурван талаас гаргалаа.
Өнөөдрийн хуралдаанаар аймгийн ИТХ-ын төлөөлөгчдийн бүрэн эрхийг баталгаажуулах, аймгийн ИТХ-ын дарга сонгож, батлах, аймгийн ИТХ-ын Тэргүүлэгчдийг сонгож, батлах, аймгийн Засаг даргад нэр дэвшүүлэх, аймгийн ИТХ-ын хороодыг байгуулах тухай асуудлыг тус тус хэлэлцэж шийдвэрлэнэ.