Улаанбаатар
Умард Солонгост "зика"-гийн тархалттай тэмцэх арга хэмжээ авч байна
ДЭЛХИЙН МЭДЭЭ | ЭРҮҮЛ МЭНДПХЕНЬЯН. /Sputnik/. Өмнөд Солонгостой залгаа хил дээр Кэсон хотод “зика” вирусийн тархалттай тэмцэх арга хэмжээг Пхеньян авч байна. Уг вирусийн халдвар авсан хэд хэдэн тохиолдол Өмнөд Солонгост бүртгэгдсэн тухай Сөүл мэдэгдсэнтэй холбоотойгоор Умард Солонгос ийм арга хэмжээ авч байна.
Умард Солонгосын холбогдох албаны хүмүүс эмч ажилчдад уг вирусийн аюулын талаар зааварчилгаа өгч байгаа аж. Уг вирусийг дамжуулдаг шумуулыг устгах ажилд гар бие оролцохыг Кэсон хотын оршин суугчдад холбогдох албаны хүмүүс үүрэг болгожээ.
Одоогоор “зика” вирусийн эсрэг вакциныг гарган аваагүй байгаа юм. Уг вирус нь тархийг ноцтой гэмтээдэг бөгөөд ургийн тархины өсөлтийг зогсоодог юм.
Уг вирус өнгөрсөн онд Бразилд анх илэрч, удалгүй Латин Америк даяар тархсан билээ. ДЭМБ-ын мэдэгдсэнээр, вирусийн тархалт 2015 оноос хойш 60 гаруй улсад бүртгэгджээ.
Өмнөд Солонгост “зика”-гийн анхны тохиолдол энэ оны гуравдугаар сард бүртгэгдсэн юм.
Г.Доржханд
