Улаанбаатар
УОК-ын Шуурхай штабын бүрэлдэхүүнд найман баг ажиллана
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Монгол Улсын Шадар сайд, Улсын онцгой комисс /УОК/-ын дарга С.Амарсайхан тушаал гарган Шуурхай штабын ажиллах түр журмыг шинэчлэн баталлаа.
УОК-ын дарга бодлого, стратегийн удирдлагаар хангах бөгөөд өдөр тутмын ажлыг Штабын дарга хариуцна. Штабын даргын дэргэд нийгэм, эдийн засгийн бодлого болон эрүүл мэндийн тусламж, үйлчилгээ, тандалт, эрсдэлийн асуудал хариуцсан зөвлөх, эрдэмтэд, яамдын дэд сайд нарын бүрэлдэхүүнтэй Ажлын баг ажиллаж, мэргэжил, арга зүй, бодлогоор дэмжихээр журамд тусгажээ.
Штабын бүрэлдэхүүнд гамшгаас хамгаалах улсын алба, тусгай чиг үүрэг бүхий болон холбогдох төрийн байгууллагын мэргэжлийн, шийдвэр гаргах түвшний албан хаагчид, МУЗН-ийн төлөөлөл ажиллах юм. Үйл ажиллагааны чиглэлээс хамаарч:
- Ажиллагаа-зохицуулалтын /эрүүл мэндийн тусламж, үйлчилгээ, татан авалт, хил, хилийн боомт нэвтрүүлэх зэрэг асуудал хариуцсан/
- Тусгаарлан ажиглах үйл ажиллагааг зохицуулах
- Орон нутаг, бүс хариуцсан
- Хяналт-шинжилгээ, үнэлгээ
- Төлөвлөлт
- Нөөц, хангалт
- Мэдээллийн технологи, харилцаа холбоо
- Захиргаа, санхүүгийн баг гэсэн бүтэцтэй ажиллана гэж Шадар сайдын Ажлын албанаас мэдээллээ.
