Увс /МОНЦАМЭ/ Саяхан “Эхийн алдар” хоёрдугаар зэргийн одонгоор шагнуулсан Улаангом сумын 3-р багийн иргэн Ч.Энхбаттай ярилцлаа. Тэрбээр 2019 онд гурван ихэр охин төрүүлсэн юм.

-“Эхийн алдар” хоёрдугаар зэргийн одон хүртсэнд баяр хүргэе. Өөрийгөө танилцуулаач?

-Намайг Чимэд-Очирын Энхбат гэдэг. Одоо 31 настай. Ам бүл 6. Дөрвөн охин болон нөхрийн хамт амьдардаг. 

Хамгийн анх 2017 оны 12-р сард том охиноо төрүүлсэн. Түүнээс хойш жил найман сарын дараа буюу 2019 оны 8-р сард гурван ихэр охиноо төрүүлсэн. Одоо ихрүүд маань сар гаруйн дараа хоёр ойндоо хүрнэ. 

-Гурван ихэр хүүхэд тээж байгаагаа яаж мэдсэн бэ?

-Ажилд ороод удаагүй байсан болохоор жирэмсний хяналтад хамрагдаагүй байлаа. Шинэ ажилтан болохоор ажил ч ундраад их байв. Тэгээд нэг өдөр ажлынхаа зав чөлөөгөөр хажууханд ойрхон байсан эмнэлэгт очиж үзүүлсэн. Тэгтэл эхо-ны эмч “Гурван ихэр хүүхэд тээж байгаа юм байна” гэхээр нь их цочирдож байлаа. Тэгэхэд бараг 12 долоо хоногтой болчихсон байсан. Ашгүй хүүхдүүд маань эрүүл саруул төрсөн. Манай ажлын газраас маш сайн дэмжиж, эрүүл мэнддээ анхаар гээд намайг амраасан. Би Улаанбаатар хотод “Айтүүс” компанид маркетингийн менежерээр ажиллаж байсан. Компани маань миний нийгмийн даатгалын шимтгэлийг одоо хүртэл төлж байгаад баярлаж явдаг.

-Хүүхдүүдээ ганцаараа асарч байгаа юу?

-Манай том охин нөгөөдүүлээсээ ой найман сарын ах болохоор бараг адилхан асаргаа шаарддаг. Би ганцаараа дөрвөн хүүхдээ асарч амжихгүй болохоор нөхөр маань ажлаасаа гарч, надад туслах болсон. Мөн хадам аав, ээж хоёр маань маш их тусалдаг. Манайх Улаанбаатар хотод амьдарч байгаад энэ хавраас Увсад шилжиж ирсэн.  

Нөхрийг маань Хайдавын Майнбаяр гэдэг. Хороонд нийгмийн ажилтнаар ажиллаж байсан. 

-Гурван ихэр ямар жинтэй төрсөн бэ?

-Хүүхдүүд маань 2.1 кг, 2 кг, 1.9 кг жинтэй төрсөн. Дутуу төрсөн болохоор эхэндээ маш их асаргаа шаардсан. Гурван ихэр хүүхдийг тээх хамгийн урт хугацаа 34 долоо хоног юм билээ. Төрөлт дөхөөд ирсэн чинь бие өвдөөд явж чадахаа больсон, тэгээд эмнэлэгт хэвтэж эмчилгээ хийлгэж байгаад төрсөн. Яг төрөх үед хажууд олон эмч, сувилагч нар байсан бөгөөд гурван ихэр охин төрлөө шүү, дутуу төрсөн учир инкубаторт хийнэ гээд аваад явчихсан. Бид дөрөв эмнэлэгт 20 гаруй хоног хэвтээд гарсан.

-Гурван ихэр хүүхэд төрүүлсэн гээд төр засгаас ямар нэгэн дэмжлэг үзүүлсэн үү?

-Хуульд гурван ихэр хүүхэд төрөхөөр тус бүрт нь 3 сая, нийт 9 сая төгрөг өгдөг юм билээ. Тэр нь тэгээд асаргаа, сувилгаа, хүүхдийн хоол гэж байтал дуусч байгаа юм. Нөхөр бид хоёр 4 хүүхдээ асрахын тулд сүүлийн хоёр жил ажилгүй байгаа. Үнэндээ 9 сая төгрөг бол юу ч болохгүй байна лээ. Барагтай бол гурван ихэр хүүхэд төрөхгүй шүү дээ. Иймээс болдог бол цаашдаа гурван ихэр хүүхдэд өгөх мөнгөө нэммээр юм шиг санагдсан

Бид хоёр хүүхдүүддээ Буянжаргал, Азжаргал, Оджаргал гэж нэр өгсөн. 

-Ихрүүд ялгах аргагүй ижилхэн үү?

-Тийм ээ. Гадны хүмүүс бол бараг ялгахгүй байх. Ихрүүд маань эгчтэйгээ нийлж тоглоод үеийнх юм шиг л байдаг. Хүүхэд төрчихөөр дорхноо том болдог юм байна. Нас залуу болохоор хүүхдүүдээ том болсны дараа дахиад төрнө. Увсад ирээд бид хоёр жимс, ногоо тарьж, хувиараа хөдөлмөр эрхэлж байгаа. 

Миний аавыг А.Чимэд-Очир гэдэг. Увс аймгийн Стандарт хэмжил зүйн хэлстийн даргаар ажиллаж байсан. Ээжийг маань М.Нэргүй гэдэг. Насаараа нягтлан бодогч хийсэн хүн бий. Харин хадам аавыг маань Хайдав, ээжийг маань Д.Батдэлгэр гэдэг. Мөн л насаараа нягтлан бодогчоор ажилласан хүмүүс бий. Манай хадам аавын тал болон миний ээжийн тал ихрийн удамтай.

-Ярилцлага өгсөнд баярлалаа. Улам өнөр болоорой.