Гал түймрийн аюулаас урьдчилан сэргийлэх нэгдсэн арга хэмжээ эхэллээ

Орон нутагт | Сэлэнгэ
otgontsetseg@montsame.mn
2021-10-22 14:51:29

Сэлэнгэ/МОНЦАМЭ/. Хүйтний улирал эхэлж, обьектын гал түймрийн тоо, давтамж сүүлийн үед нэмэгдэж байгаа тухай аймгийн ОБГ-аас мэдээллээ. Үүнтэй холбогдуулан тус байгууллагын зүгээс болзошгүй гал түймрийн аюулаас урьдчилан сэргийлэх, эрсдэлийг бууруулах зорилгоор “Гал түймрийн аюулаас урьдчилан сэргийлэх нэгдсэн арга хэмжээ”-г хүн ам олноор суурьшсан Сүхбаатар, Мандал, Сайхан, Баянгол, Хүдэр суманд зохион байгуулж эхэллээ. Нэгдсэн арга хэмжээний хүрээнд тус сумдын айл, өрхөд хяналт шалгалтыг зохион байгуулж, иргэдэд галын аюулгүй байдлыг хангах, гал түймрээс урьдчилан сэргийлэх талаар зөвлөмж өгч ажиллаж байгаа аж.

Аймгийн ОБГ-аас иргэдэд гал түймрийн аюулаас урьдчилан сэргийлэхэд дараах зүйлсийг анхааруулж байна

–Галтай зүйл хог хаягдлыг хогийн суваг, хогийн ил цэгт хаяхгүй байх

–Гэр орондоо зул, хүж асаахдаа галын аюулгүй байдлыг хангаж, хяналтгүй орхихгүй байх

–Шингэрүүлсэн шатдаг хийгээр ажилладаг тулга, зуухыг ашиглахдаа аюулгүй ажиллагааны дүрэм журмыг баримтлан анхаарал болгоомжтой байх (шаардлагатай тохиолдолд мэргэжлийн байгууллагаас зөвлөгөө авах)

–Цахилгаан ашиглалтын дүрэм журмыг сайтар мөрдөж, эвдрэл гэмтэлтэй, зориулалтын бус цахилгаан хэрэгсэл ашиглахгүй байх

–Гарааш, ил зогсоолд автомашинаа байрлуулахдаа галын аюулгүйн зай хэмжээг баримтлан хэт шахаж байрлуулахгүй байх

–Байр орон сууцны орчимд шуурхай албаны автомашин бөглөхгүй байх

–Цахилгаан хэрэгслийг хүчдэлээс салгаж орхих

–Бага насны хүүхдийг харж асрах хүнгүйгээр гэрт нь цоожилж орхихгүй байхыг Сэлэнгэ аймгийн Онцгой байдлын газраас онцгойлон анхаарууллаа.

Сумдын ИТХ-ын дарга нарыг чадавхжуулах сургалт болж байна 

Холбоотой мэдээ