Нийт зээлийн 75 хувийг үйлдвэрлэлийн зээл эзэлж байна

ОРОН НУТАГТ | Сүхбаатар
odonchimeg@montsame.mn
2022-01-29 17:31:25

Сүхбаатар /МОНЦАМЭ/. Тус аймагт урьд жилүүдэд нийт зээлийн 60-70 хувийг хэрэглээний зээл эзэлж байсан бол 2021 онд нийт зээлийн 75 хувийг малчны болон үйлдвэрлэлийн зориулалтай бизнесийн зээл эзэлжээ. Үүнийгээ дагаад иргэдийн хадгаламжийн орлого ч нэмэгдсэн байна. Ингэснээр Сүхбаатар аймгийн эдийн засагт нааштай өөрчлөлт орж буйг онцлов.

Өөрөөр хэлбэл орон нутагт өрхийн болон ЖДҮ нэмэгдэж, үүнийгээ дагаад ажлын байр нэмэгдэх, хадгалагдах цаашлаад эдийн засгийн үр өгөөжийг дээшлүүлэх өндөр ач холбогдолтой гэж Монгол банкны Сүхбаатар аймаг дахь салбараас танилцууллаа.

Тодруулбал, нийт зээлийн хэмжээ 45,5 тэрбумаар өсч 180 тэрбум төгрөгт хүрчээ. Энэ өсөлтөд гурван хувийн хүүтэй ажлын байр хадгалах, малчдад зориулсан, ипотекийн гэх мэт цар тахлаас үүдэн тулгарч буй эдийн засгийн уналтыг сааруулах зорилго бүхий зээлүүд нөлөөлсөн гэж үзэж байгаа аж. Ингэж зээлийн хэмжээ нэмэгдсэн ч чанаргүй зээлийн хэмжээ 1,3 хувиар буурсан эерэг үзүүлэлт мөн гарчээ.

 

Холбоотой мэдээ