Нутгийн өөрөө удирдах байгууллагын ажилтнуудыг чадавхжуулж байна

ОРОН НУТГИЙН МЭДЭЭ | БАЯНХОНГОР
munkhzul@montsame.mn
2022-05-19 16:00:50

Баянхонгор /МОНЦАМЭ/. Хангайн бүсийн аймгуудын ИТХ-ын байгууллагын ажилтнуудыг чадавхжуулах сургалтыг энэ сарын 19-20-ны өдрүүдэд Баянхонгор аймагт зохион байгуулж байна.

Сургалтыг Засгийн газрын Хэрэг эрхлэх газар, Баянхонгор аймгийн ИТХ, Швейцарын хөгжлийн агентлагаас “Нутгийн өөрөө удирдах байгууллагын институцын чадавхыг бэхжүүлэх” төслийн хүрээнд хийж байгаа аж.

Нутгийн өөрөө удирдах байгууллагын 30 жилийн ойн хүрээнд нийт ажлын албаны бүрэлдэхүүний чадавхыг бэхжүүлэх, хамтын ажиллагааг сайжруулах, харилцан туршлага солилцох үйл ажиллагааг Баянхонгор аймгийн ИТХ-ын дарга Э.Энхбат, нийслэлийн ИТХ-ын дарга Ж.Батбаясгалан нар нээж үг хэлэв.

Сургалтад Засгийн газрын хэрэг эрхлэх газрын референтүүд, “Нутгийн өөрөө удирдах байгууллагын институцын чадавхыг бэхжүүлэх” төслийн зохицуулагч Л.Мэнд-Амар,  Нийслэл болон  Баянхонгор, Архангай, Өвөрхангай, Булган, Орхон, Хөвсгөл аймгуудын ИТХ-ын дарга,  хурлын нарийн бичгийн дарга тэргүүтэй, ажлын албаны ажилтнууд тус тус хамрагдаж байна.

Сургалтаар “Төрийн албан хэрэг хөтлөлт, анхаарах асуудлууд”, “Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн талаарх зарим асуудлууд”, Төрийн байгууллагын чанарын менежементийн тогтолцооны стандарт нэвтрүүлэх нь”, гэмт хэргээс урьдчилан сэргийлэх ажлын бодлого, чиглэл болон салбар зөвлөлийн хамтын ажиллагаа”, “Хурлын хороо-төлөөлөгчийн үйл ажиллагаа, иргэдийн  оролцоог хангахад Хурлын ажлын албаны үүрэг” зэрэг мэдээлэл өгч, үйл ажиллагаандаа нэвтрүүлэх талаар чөлөөт  хэлэлцүүлэг өрнүүлэх аж.

Холбоотой мэдээ