Улаанбаатар
АНУ-ын Тээврийн аюулгүй байдлын захиргааны төлөөлөл “Чингис хаан” ОУНБ-ын ажилтай танилцана
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. ИНЕГ-ын дарга, удирдлагууд АНУ руу шууд нислэг үйлдэх бэлтгэл ажлын хүрээнд “Нисэх буудлын нисэхийн аюулгүй ажиллагааны үнэлгээнд хамрагдах” бэлтгэл хангах талаар АНУ-ын Элчин сайдын яам болон Тээврийн аюулгүй байдлын захиргааны төлөөлөгчидтэй уулзлаа.
Уулзалтын эхэнд ИНЕГ-ын дарга Ч.Мөнхтуяа “Монгол Улс, АНУ-ын Агаарын харилцааны
тухай Засгийн газар хоорондын хэлэлцээр байгуулахаар тохирч, энэ оны 1 дүгээр сард үзэглэсэн. Ингэснээр хоёр улсын хооронд агаарын
шууд харилцаа тогтоох,
агаарын тээврийг хөгжүүлэх, худалдаа, аялал жуулчлал, иргэдийн зорчих
хөдөлгөөнийг таатай нөхцөлөөр хангах боломжийг нэмэх ач холбогдолтой”-г тэмдэглэв. Нисэх
буудлын нисэхийн аюулгүй байдлын үнэлгээнд хамрагдах бэлтгэл ажлын хүрээнд
дэмжлэг үзүүлж буй АНУ-ын
Тээврийн аюулгүй байдлын захиргаанд талархал илэрхийлж, энэ удаагийн айлчлалаар
“Чингис Хаан” ОУНБ-ын аюулгүй байдлын арга хэмжээтэй танилцаж, зохих зөвлөмж
өгч, туршлагаасаа хуваалцан, хамтран ажиллахыг хүслээ.
TSA-ийн төлөөлөгч Шерри Сото, “Чингис хаан” ОУНБ-ын үйл
ажиллагаа, аюулгүй байдлын үзлэгийг хэрхэн хийдэг үйл ажиллагаатай танилцсаны
үндсэн дээр санал бодлоо солилцож, шаардлагатай зөвлөгөө өгөхөө хэлжээ.
ИНЕГ нь хоёр улсын хооронд шууд нислэг үйлдэх бэлтгэлийг эрчимжүүлэн, АНУ-ын Холбооны
Нисэхийн Захиргаа /FAA/, АНУ-ын Тээврийн аюулгүй байдлын захиргаа /TSA/-тай
хамтран Агаарын харилцаа, эдийн засгийн зохицуулалт бүрдүүлэх, АНУ-ын Холбооны
нисэхийн захиргаанаас хийх олон улсын нисэхийн аюулгүй ажиллагааны IASA аудит
шалгалт, мөн нисэх буудлын нисэхийн аюулгүй
байдлын үнэлгээнд хамрагдах бэлтгэл хангах ажлын хэсгийг байгуулаад байгаа аж. 
