Чикунгуняа вирусийн халдвар авсан 10 хүн нас баржээ

ДЭЛХИЙН МЭДЭЭ | ЭРҮҮЛ МЭНД
sarnai@montsame.mn
2016-09-15 15:00:49

ШИНЭ ДЕЛИ. /indianexpress/. Энэтхэг улсад 40 мянга орчим хүн хумхаа өвчин болон чикунгуняа вирусийн улмаас шаналан зовж байна гэж тус улсын Эрүүл мэнд, гэр бүлийг дэмжих яамны сайд Ж.П. Надда мэдээлжээ.

Хумхаа өвчин болон чикунгуняа вирус Дели хотод дэгдсэний улмаас 24 цагийн дотор 10 хүн нас баржээ. Үүнтэй холбоотойгоор тус мужийн Ерөнхий сайд Арвинд Кежиривалын Засгийн газрыг хүчтэй шүүмжилсээр байгаа юм.

Чикунгуняа нь шумуулаар дамждаг халдварт өвчин бөгөөд уг өвчнөөр нас барсан хүний тоо 5 байснаа одоо 10-т хүрчээ. Дели хотын Эрүүл мэндийн хүрээлэнгийн мэдээлснээр, "Аполло" эмнэлэгт 775, "Сафдуржан" эмнэлэгт 531, нийтдээ 1360 халдвар авсан тохиолдол бүртгэгдсэн байна.

“Ганга Рам" хэмээх хувийн эмнэлэгт 4 хүн чикунгуняагийн улмаас нас барсан. Өөр эмнэлгүүдэд ямар нэгэн бүртгэл хийгдээгүй. Мэдээлэл явуулж байхыг тушаасан” гэж мягмар гарагийн орой Дели мужийн Эрүүл мэндийн сайд Сатендар Жаин твиттер хуудсандаа бичжээ.

Түүний хэлснээр, уг өвчин нь үхэлд хүргэдэггүй ажээ.

Халдварлан дамждаг эдгээр өвчнүүд нь жилийн энэ үед газар авдаг бөгөөд шумууланд хазуулахаас сэргийлэхийн тулд утаа май тавих эсвэл ариутгал хийх зэргээр ямар нэгэн арга хэмжээ авах хэрэгтэй юм.

Х.Сарнай

 

Холбоотой мэдээ