Улаанбаатар
Шадар сайд Т.Доржханд Дэлхийн банкны Монгол дахь суурин төлөөлөгчийг хүлээн авч уулзлаа
МОНГОЛЫН МЭДЭЭ | УЛС ТӨР
Улаанбаатар, 2024 оны наймдугаар сарын 27 /МОНЦАМЭ/. Монгол Улсын Шадар сайд Т.Доржханд Дэлхийн банкны Монгол дахь суурин төлөөлөгч, ноён Таехюн Лиг өнөөдөр хүлээн авч уулзлаа.
Монгол Улсын найдвартай хамтрагч, дэмжигч байгууллага байж ирсэн Дэлхийн
банканд Шадар сайд талархал илэрхийлж, Үндсэн хуулийн өөрчлөлтийн хүрээнд бий
болсон УИХ, хамтарсан Засгийн газрын үндсэн зорилго бол олон жил
гацсан томоохон төслүүдийг хөдөлгөх, эдийн засгийн реформыг эхлүүлэх болохыг
суурин төлөөлөгчид танилцууллаа.
Эрчим хүчний салбарын хөрөнгө оруулалт, үнэ тарифын шинэчлэл, мега төслүүд
хариуцсан дэд хорооны даргаар Шадар сайд томилогдсонд суурин төлөөлөгч гүнээ
талархалтай байгаагаа илэрхийлээд, Дэлхийн банкны зүгээс Монгол Улсын эрчим хүчний
салбарыг шинэчлэх чиглэлд хэрэгжүүлж буй хөрөнгө оруулалт, техникийн
туслалцааны төслүүдээ танилцуулж дэд хороотой нягт хамтрах ажиллах талаар санал
солилцов.
Мөн Шадар сайдын эрхлэх ажлын хүрээнд бизнес, худалдаа,
хөрөнгө оруулалтын таатай орчныг бий болгоход Дэлхий банкны зүгээс хамтран
ажиллахад бэлэн байгаагаа суурин төлөөлөгч илэрхийллээ.
