Монгол Улсын Ерөнхийлөгч У.Хүрэлсүх “Ирээдүйн асуудлаарх дээд түвшний чуулга уулзалт”-д оролцож байна

khandmaa@montsame.gov.mn

2024-09-22 22:11:15

Улаанбаатар, 2024 оны есдүгээр сарын 22 /МОНЦАМЭ/. Монгол Улсын Ерөнхийлөгч Ухнаагийн Хүрэлсүх “Ирээдүйн асуудлаарх дээд түвшний уулзалт”-д оролцохоор НҮБ-ын Төв байранд хүрэлцэн ирлээ.

“Ирээдүйн асуудлаарх дээд түвшний уулзалт”-ыг зохион байгуулах санал НҮБ-ын Ерөнхий нарийн бичгийн даргын “Бидний нийтлэг зорилго” илтгэлд туссан бөгөөд энэ жилийн чуулга уулзалтыг “Илүү сайхан маргаашийн төлөөх олон талт шийдлүүд” сэдвийн дор 2024 оны 9 дүгээр сарын 22-23-ны өдрүүдэд Нью-Йорк хотноо зохион байгуулж байна.

Дээд түвшний уулзалтад 83 улсын төрийн тэргүүн, хоёр улсын дэд Ерөнхийлөгч, 52 улсын Засгийн газрын тэргүүн, 5 гишүүн улсын Шадар сайд оролцож байгаа юм.

Чуулга уулзалтаар үндсэн баримт бичиг болох “Ирээдүйн төлөө гэрээ”-г баталж, “Ирээдүй хойч үеийн асуудлаарх тунхаглал”, “Дэлхий нийтийн цахим хөгжлийн гэрээ” гэсэн баримт бичгүүдийг хавсралт хэлбэрээр батлах юм.

Мөн энэ үеэр “Дэлхийн засаглалыг өөрчилж, “Тогтвортой хөгжлийн зорилтууд-2030” хөтөлбөрийн хэрэгжилтийг эрчимжүүлэх нь”, “Олон улсын энх тайван, аюулгүй байдлын төлөөх олон талт үзлийг бэхжүүлэх нь”, “Нийтлэг цахим ирээдүйн төлөө: Цахим хуваагдлыг арилгахад хүртээмжтэй инновац, хамтын ажиллагааг бэхжүүлэх нь”, “Ирээдүй одоо эхэлнэ: өнөөгийн болон ирээдүй хойч үеийнхний төлөө дэлхийн тогтолцоог сайжруулах нь” сэдэвт хэлэлцүүлгүүдийг зохион байгуулна.

Монгол Улс “Ирээдүйн төлөөх дээд түвшний уулзалт”-ыг угтаж “Дэлхийн эмэгтэйчүүдийн чуулга уулзалт”, “Тогтвортой хөгжлийн зорилгуудын үндэсний зөвлөлдөх уулзалт”, “Залуучуудын зөвлөлдөх уулзалт” “Глобал цахим хэлэлцүүлэг”, “Дижитал хамтын ажиллагааны яриа хэлэлцээ” “Тогтвортой хөгжилд шинжлэх ухаан, технологи, инновацыг ашиглах асуудлаарх зөвлөлдөх уулзалт” зэрэг үйл ажиллагааг цуврал хэлбэрээр зохион байгуулсан.

Монгол Улсын Ерөнхийлөгчийн ивээл дор 2024 оны 8 дугаар сард Улаанбаатар хотноо зохион байгуулсан Дэлхийн эмэгтэйчүүдийн чуулга уулзалтаас гарсан “Тогтвортой ирээдүйн төлөөх Улаанбаатарын тунхаглал”-ын үзэл санаа “Ирээдүйн асуудлаарх дээд түвшний уулзалт”-аар батлах төгсгөлийн баримт бичгүүдийн төсөлд тусгалаа олсон хэмээн Монгол Улсын Ерөнхийлөгчийн тамгын газраас мэдээллээ.

Монгол Улсын Ерөнхийлөгч У.Хүрэлсүх “Ирээдүйн асуудлаарх дээд түвшний чуулга уулзалт”-д оролцож байна

Холбоотой мэдээ

Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай хуулийн төслийг өргөн барилаа

Кокс химийн үйлдвэрийн бүтээн байгуулалтыг ирэх оны хоёрдугаар улиралд эхлүүлнэ

Хархорум хотын бүтээн байгуулалт, хөгжлийг дэмжих тухай хуулийн төслийг өргөн барив

Үндэсний баялгийн санг “Чингис сан” гэж нэрлэв

Төрийн болон нутгийн захиргааны байгууллагыг өндөржүүлсэн бэлэн байдлын зэрэгт шилжүүллээ

“Эрдэнэс Тавантолгой” ХК-ийн хувьцаа эзэмшигч иргэн бүрд 135 мянган төгрөг өнөөдөр олгоно

Үндэсний баялгийн сангийн Ирээдүйн өв санд 4 их наяд төгрөгийг төвлөрүүлжээ

Агаарын бохирдол, утааны асуудлаар хяналтын сонсгол зохион байгуулна

Засгийн газар өнөөдөр ээлжит бусаар хуралдана

бидэнтэй нэгдэх

Хандалт