Улаанбаатар
"Соёлын бүтээлч сар" аян сарын турш үргэлжилнэ
МОНГОЛЫН МЭДЭЭ | СОЁЛ УРЛАГ
Улаанбаатар, 2024 оны аравдугаар сарын 31 /МОНЦАМЭ/. Соёл, спорт, аялал жуулчлал, залуучуудын яам, Засгийн газрын хэрэгжүүлэгч агентлаг Соёл, урлагийн газар, Биеийн тамир, спортын улсын хорооноос улс орон даяар “Соёлын бүтээлч сар” аяныг 2024 оны 11 дүгээр сарын 1-30-нд зохион байгуулна.
Энэхүү аян Монгол Улсын урт хугацааны хөгжлийн бодлого “Алсын хараа-2050”, Монгол Улсын Засгийн газрын 2024-2028 оны үйл ажиллагааны хөтөлбөр, Монгол Улсын Засгийн газрын 2022 оны “Соёлын бүтээлч үйлдвэрлэлийн тэргүүлэх чиглэл, арга хэмжээ батлах тухай” 314 дүгээр тогтоол, “Соёлын тухай” хууль, “Соёлын бүтээлч үйлдвэрлэлийг дэмжих тухай” хуулийн хэрэгжилтийг хангах, төр, хувийн хэвшлийн түншлэл, хамтын ажиллагааг хөгжүүлэх, соёл урлаг, спортын олон талт үйл ажиллагаагаар дамжуулан иргэдийг соён гэгээрүүлэх, үндэсний нэгдмэл үнэт зүйлийг бэхжүүлэх, соёл, спорт, аялал жуулчлалын салбарын эдийн засаг, нийгмийн үр өгөөжийг дээшлүүлэх зорилготой.
2021 оноос уламжлал болгон зохион байгуулсан аяны хүрээнд нийт 5,691 үйл ажиллагаанд 1,622,000 иргэнийг хамруулж байв.
Дөрөв дэх жилдээ зохион байгуулж буй “Соёлын бүтээлч сар” аян “Соёлын өв”, “Урлаг-уран бүтээл”, “Соён гэгээрэл”, “Спортын” чиглэлээр үзэсгэлэн, урлагийн тоглолт, бүтээлч экспо, хэлэлцүүлэг, спортын уралдаан тэмцээн, боловсролын хөтөлбөр, бүх нийтийн боловсрол олгох оролцоот хөтөлбөр зэрэг хүүхэд залуус, иргэдэд чиглэсэн 2000 орчим арга хэмжээг төрийн болон төрийн бус байгууллага, хувийн хэвшлийн 500 орчим байгууллага, уран бүтээлчийн оролцоотой зохион байгуулах юм.
Арваннэгдүгээр сарын турш Монгол орон даяар музей, мэргэжлийн урлагийн байгууллага, аймаг, нийслэл, сум, дүүргийн соёлын төв, ордон нь үйл ажиллагааны онцлогт тулгуурлан тухайн орон нутаг, байгууллагаас төрөн гарсан эрдэмтэн судлаач, алдар суут хүмүүсээ сурталчлан алдаршуулах бөгөөд 21 аймаг, нийслэл, дүүрэг, сумдын соёл урлаг, спортын 454 байгууллага, 1600 орчим үйл ажиллагааг зохион байгуулах юм.
“Соёлын бүтээлч сар” 2024 аяны төвлөрсөн үйл ажиллагаа
“Соёлын бүтээлч сар” аяны нээлт (Соёл, урлагийн байгууллагууд)
Соёлын өв, Урлаг уран бүтээл, Соён гэгээрэл, Спортын хэлэлцүүлэг (цахимаар)
Залуучуудад зориулсан тоглолт
Салбарын ахмадуудад хүндэтгэл үзүүлэх тоглолт
Соёл, спортын хөрөнгө оруулалтын арга хэмжээ
Соёлын экспо
Спортын экспо
Салбарын удирдах ажилтны зөвлөгөөн
“Соёлын бүтээлч сар”-ын нэгдсэн форум тус тус болно.
