Улаанбаатар
БАЯНХОНГОР: Мөсөн дээгүүр авто тээвэр хийхгүй байхыг анхаарууллаа
ОРОН НУТГИЙН МЭДЭЭ | БАЯНХОНГОР
Баянхонгор, 2025 оны дөрөвдүгээр сарын 2 /МОНЦАМЭ/. Гол нууруудын мөсөн бүрхүүл нийт уртын дагууд мөсний зузаан харилцан адилгүй байгаа тул цаг хожих, зам товчлох зэргээр мөсөн дээгүүр явах болон авто тээвэр хийхгүй байхыг зөвлөлөө.
Баянхонгор аймгийн судалгаатай гол, нууруудын мөсний зузааны болон усны түвшин энэ сарын нэгний өдрийн байдлаар:
Хангайн нурууны өмнөд хажуугаас эх авах Баянхонгор сумын Түйн голын усны түвшин 42 см, мөсний зузаан 30 см, мөсөн бүрхүүл, харзтай, Түй-Богд, мөсний зузаан 42 см, Шаргалжуут усны түвшин 121 см, мөсний зузаан 56 см, Орог нуур мөсний зузаан 20 см ёроолдоо хүртэл хөлдсөн мөс харлах үзэгдэлтэй байна.
Харин хангайн нурууны өврөөс эхтэй Галуут сумын Цагаантуруут мөсний зузаан 102 см, Заг мөсний зузаан 41 см, Байдраг-Байдраг мөсний зузаан 100 см, голууд ёроолдоо хүртэл хөлдсөн, мөсний зузаан 40-102 см байгаа бол Байдраг-Баянбүрд голын усны түвшин 95 см, мөсний зузаан 30 см, битүү мөсөн бүрхүүл харзтай байгаа юм.
Гурванбулаг Шар-Ус мөсний зузаан 18 см, ёроолдоо хүртэл хөлдсөн, Хөх-Нуурын усны түвшин 110 см, мөсний зузаан 116 см битүү мөсөн бүрхүүлтэй, Бөөнцагаан-Баацагаан нуур битүү мөсөн бүрхүүл усан захтай мөсний зузаан 82 см байна.
