Улаанбаатар
Нийслэлийн 2025 оны зам засвар, шинэчлэлийн ажил эхэллээ
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 2 /МОНЦАМЭ/. Нийслэлийн хэмжээнд энэ онд 36 байршилд 74 км авто замыг засаж, шинэчлэхээр болжээ.
Тэгвэл энэ оны зам засвар, шинэчлэлийн ажил албан ёсоор эхэллээ. Энэ талаар нийслэлийн Замын хөгжлийн газрын Засвар арчлалтын хяналтын хэлтсийн дарга О.Энхбаатар ярихдаа, “Энэ онд нийслэлийн 36 байршилд зам засварын ажил хийхээр төлөвлөсөн. Үүний 26 нь он дамжиж хийж байгаа бөгөөд үлдсэн 10 байршил нь бидний шинээр төлөвлөсөн замууд юм. Зам засварын ажил Зүүн дөрвөн замаас 25 дугаар эмийн сан хүртэлх зам засварын ажлаар эхэллээ. Уг ажлын хүрээнд замын хажуугийн авто машины карма зогсоолуудыг хаах, хашлага болон нүхэн эвдрэлийн засварлах ажлуудыг эхлүүлсэн. Хэсэгчилсэн асфальт хучилтын ажил энэ сарын 25-наас эхэлнэ. Энэ жил нийслэлийн гол гудамж, замуудыг засварлахаар төлөвлөсөн. Тухайлбал, Чингисийн өргөн чөлөө, Энхтайваны өргөн чөлөө зэрэг олон жилийн насжилттай гол гудамж, замуудыг засна. Зам хаах мэдээллийг тухай бүрд иргэдэд хүргэнэ” гэлээ.
Албаныхны мэдээлснээр энэ жил 1978 оноос хойш их засвар хийгээгүй Найрамдлын зам, 2008 оноос хойш их засвар хийгээгүй Энхтайваны өргөн чөлөөний замыг бүрэн шинэчлэх ажээ. Энхтайваны өргөн чөлөөний нийт 8.9 км авто зам болон Найрамдлын 16 км замын засварыг долоодугаар сарын 10-наас өмнө хийж дуусгах юм.
