Улаанбаатар
ТӨВ: “Уран жиргээ" наадамд хүүхдүүд сургамжит өгүүллэгээр түлхүү оролцжээ
ОРОН НУТГИЙН МЭДЭЭ | ТӨВ
Зуунмод, 2025 оны дөрөвдүгээр сарын 3 /МОНЦАМЭ/. “Уран жиргээ-2025” аймгийн аварга шалгаруулах уран уншлагын уралдааныг аймгийн Хүүхэд залуучуудын ордны Их танхимд энэ сарын 2-ны өдөр зохион байгуулав.
Энэ жилийн “Уран жиргээ-2025” уран уншлагын уралдаанд 20 сумын 84 хүүхэд, багачууд сургуулийн өмнөх нас, сургуулийн бага, дунд, ахлах гэсэн дөрвөн насны ангилалд өрсөлдсөн юм.
Уралдааныг хүүхдийн шилдэг зохиол бүтээлийг хүүхэд багачуудад таниулах, сурталчлах, тэдний дунд уран уншлагын урлагийг хөгжүүлэх зорилгоор жил бүр зохион байгуулдаг уламжлалтай.
Тэмцээнд хүүхдүүд сургамжит өгүүллэгээр түлхүү оролцож байгаа нь шүүгчдийн анхаарлыг татсан бөгөөд цаашдаа ч олон зохиол судалж дүрийн судалгаа хийж сурахыг зөвлөлөө.
Сургуулийн өмнөх насны ангилалд тэргүүн байрт Угтаалцайдам сумын цэцэрлэгийн С.Сэцэнгуа шалгарсан бол сургуулийн бага насны ангиллын тэргүүн байрт Зуунмод сумын ерөнхий боловсролын дөрөвдүгээр сургуулийн сурагч Т.Ууганбямба шалгарчээ.
Сургуулийн дунд насны ангиллын тэргүүн байрт Мөнгөнморьт сумын Б.Болорчимэг, ахлах насны ангиллын тэргүүн байрт Эрдэнэсант сумын Ц.Эрдэнэдаваа тус тус шалгарав.
Оролцогч Баянцогт сумын ерөнхий боловсролын сургуулийн сурагч Б.Усны-Эхээс сэтгэгдлийг
тодруулахад, үеийнхээ хүүхдүүдтэй танилцаад,
өөрийгөө илэрхийлэх боломж олдсонд маш их баяртай байна. Шүлэг, яруу найргийг
сүүлийн гурван жилийн хугацаанд сонирхох болсон. Цаашдаа ч илүү гүн гүнзгий
судлах хүсэлтэй байгаа гэв.
