Улаанбаатар
Япон, Энэтхэгийн хамтын ажиллагааг өргөжүүлэхээр тохиролцжээ
ДЭЛХИЙН МЭДЭЭ | УЛС ТӨР
ТОКИО, 2025 оны наймдугаар сарын 30 /NHK/. Японы Ерөнхий сайд Шигэрү Ишиба, Энэтхэгийн Ерөнхий сайд Нарендра Моди нар Токио хотноо дээд хэмжээний уулзалт хийж, аюулгүй байдал, эдийн засаг, иргэд хоорондын солилцоо зэрэг өргөн хүрээнд хамтын ажиллагаагаа эрчимжүүлэхээр тохиролцжээ.
Баасан гарагт болсон уулзалтын эхэнд Ш.Ишиба 2014 оны
есдүгээр сард Ерөнхий сайдын хувиар Японд хийсэн Н.Модигийн анхны айлчлалын
талаар дурссан байна. Тухайн үед Н.Моди болон Японы Ерөнхий сайд агсан Абэ
Шинзо нар Япон, Энэтхэгийн стратегийн болон дэлхийн тусгай түншлэлийн талаар
тохиролцоонд хүрч байсан юм.
Ш.Ишиба хэлсэн үгэндээ, Н.Моди сүүлийн 10 жилийн хугацаанд
хоёр орны харилцааг хөгжүүлэхэд ихээхэн хувь нэмэр оруулсныг дурдаад, энэ удаагийн
дээд хэмжээний уулзалтаар ирэх 10 жилийн хугацаанд өрнөх харилцаагаа шинэ
өндөрлөгт хүргэнэ гэдэгт найдаж байгаагаа илэрхийлсэн байна.
Үүний хариуд Н.Моди Энэтхэг, Япон зэрэг хүчирхэг эдийн
засагтай ардчилсан орнуудын хувьд хамтын ажиллагаа ихээхэн ач холбогдолтойг
онцлон тэмдэглэв. Улмаар хоёр удирдагч хагас дамжуулагч, чухал ашигт малтмал, хиймэл
оюун ухаан, эм зүй зэрэг салбар дахь хамтын ажиллагааг хөгжүүлэхэд чиглэсэн
эдийн засгийн аюулгүй байдлын шинэ тогтолцоог бий болгохоор тохиролцжээ.
Мөн талууд батлан хамгаалах салбарын хамтын ажиллагааны
тодорхой алхмуудыг тусгахын тулд аюулгүй байдлын тухай 2008 оны хамтарсан
тунхаглалд өөрчлөлт оруулах төлөвлөгөөг баталжээ. Тэд мөн ирэх 10 жил болон
түүнээс цааших хугацаанд Японоос Энэтхэгийн хувийн хэвшлийн салбарт 10 их наяд
иен буюу ойролцоогоор 68 тэрбум ам.долларын хөрөнгө оруулалт хийх шинэ зорилтыг
дэвшүүлэхээр тохиролцсон байна.
Хамтарсан хэвлэлийн бага хурал дээр Ш.Ишиба хэлэхдээ, дэлхийн хамгийн олон хүн амтай Энэтхэг эдийн засгийн гайхалтай өсөлтөд хүрсэн гэдгийг цохон тэмдэглээд, тус улс инновацаар дамжуулан дэлхийг өөрчилж чадна, харин Японд дэлхийн өсөлтийг хангах өндөр түвшний технологи бий гэжээ. Ш.Ишиба мөн хоёр орон харилцан бие биедээ асуудлыг шийдвэрлэхэд тусалж, ирээдүй хойч үедээ тулгарах асуудлыг шийдвэрлэхийн тулд эрдэм мэдлэгээ хуваалцах ёстой хэмээн хэллээ. Харилцан бие биеэ нөхөх харилцаа нь хоёр оронд аль алинд нь ашигтай гэдгийг тэрбээр онцлон хэлжээ.
