Улаанбаатар
Зэвсэгт хүчний 331 дүгээр ангийн 40 айлын шинэ орон сууц ашиглалтад оров
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/.Зэвсэгт хүчний 331 дүгээр ангийнхны хувьд өчигдөр түүхэн өдөр болов. Тус ангийн шинэ барилга байгууламжууд ашиглалтад орж, байлдааны тугаа ч гардан авлаа. УИХ, Засгийн газрын гишүүн, Батлан хамгаалахын сайд Н.Энхболд тэргүүтэй БХЯ, ЗХЖШ-ын удирдлагууд баруун аймгуудад ажиллахдаа энэ ангийн шинэ байгууламжуудыг ашиглалтад хүлээн авч, цэргийн ангийн дайчин уламжлал, бахархал, эх орноо батлан хамгаалах ариун үүрэг, алдар гавьяаны илэрхийлсэн болон байлдааны тугийг нь ёслол төгөлдөр гардуулан өгсөн байна.
Хурандаа Ц.Буянтогтох захирагчтай Зэвсэгт хүчний 331 дүгээр ангийнхан шинэ оноос өмнө 40 айлын орон сууц, штабын байр, цэргийн гал тогоо, шалган нэвтрүүлэх байр, цахилгааны дэд өртөө зэрэг олон бүтээн байгуулалтын ажил хийжээ. Энэхүү бүтээн байгуулалтыг хурандаа Б.Дорждэрэм захирагчтай Зэвсэгт хүчний 340 дүгээр ангийнхан маш богино хугацаанд барьж ашиглалтад оруулсан байна. Батлан хамгаалахын сайд Н.Энхболд “Түүхэнд тодоор бичигдэх сайхан үйл явдал тохиож байна. Байлдааны туг авах ёслолд оролцоно гэдэг хүн бүрт тохиогоод байдаггүй ховор завшаан. Байлдааны туг гэдэг бол түүхэн хүнд цаг үед эх орноо алтан амиараа хамгаалсан баатарлаг дайчдын маань амин зүрх байсан юм. Зэвсэгт хүчний анги оршин байхын, эрч хүчний илэрхийлэл болсон энэхүү байлдааны туг дор та бүхний маань ажил үйлс үргэлж мандан бадарч байх болтугай” гэж баяр хүргэв. ЗХЖШ-ын дарга, дэслэгч генерал Д.Даваа “Богино хугацаанд үйл ажиллагаагаа жигдрүүлж, сургалт бэлтгэлээ базааж, бүтээн байгуулалтдаа гар бие оролцож, олон сайхан үйл явдлын ард хамтдаа гарч байгаа дайчдаараа бахархаж байна. Ангийн бүтээн байгуулалт үүгээр зогсохгүй, цаашид үргэлжилнэ. Барилгуудыг стандартын дагуу богино хугацаанд барьж дуусгасан барилга, инженерийн 340 дүгээр ангийнхандаа баяр хүргэе" гэсэн бол Баян-Өлгий аймгийн ИТХ-ын дарга Д.Бауржин “Манай аймаг дахь төрийн байгууллагуудаас Зэвсэгт хүчний ангиуд маань үргэлж манлайлж ирсэн. Зуд турхан тохиолдохоос эхлээд олон хүндрэлтэй цаг үед Зэвсэгт хүчний 340 болоод 331 дүгээр ангийнхан орон нутагтаа тусалж байгааг дарга нарт нь уламжилмаар байна. Орон нутгийн удирдлагуудын хувьд дэмжиж ажиллана” гэлээ. Ийнхүү Зэвсэгт хүчний 331 дүгээр ангийнхан шинэ байрандаа төвхнөж, байлдааны тугаа ёслол төгөлдөр залсан хурандаа Ц.Буянтогтох даргатай хамт олон шинэ оноо сайхан угтаж байна.
Ж.Батсайхан
