Ulaanbaatar
Улаанбаатар-Нур-Султан чиглэлийн нислэг зургаадугаар сард эхэлнэ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Казахстаны агаарын тээврийн “СКАТ” компани энэ оны зургаадугаар сарын 3-наас эхлэн Улаанбаатар-Нур-Султан (хуучнаар Астана), Нур-Султан-Улаанбаатар чиглэлд нислэг үйлдэнэ.
Тус компанийн удирдлагууд өнөөдөр Монголын аялал жуулчлалын компаниудын
төлөөлөлтэй уулзаж, үйлчилгээгээ танилцуулав. Долоо хоног бүрийн даваа, пүрэв
гарагт Улаанбаатар-Нур-Султан чиглэлээр нислэг үйлдэх бөгөөд 6 цаг үргэлжлэх нислэгийн тасалбарын үнэ нэг талдаа 240, хоёр талдаа 440 ам.доллар байх юм. Нислэгийн энэхүү чиглэлд
144 хүний суудалтай “Боинг 737-700” агаарын хөлгийг, шаардлагатай
тохиолдолд буюу сэлгээнд “Боинг737-300” хөлөг ашиглахаар төлөвлөжээ.
Монгол, Казахстан улсын бараа эргэлт 2018 онд 74.4 сая ам.доллар байсан
бөгөөд Улаанбаатар-Нур-Султан чиглэлд шууд нислэгтэй болсноор хоёр орны бизнес
эрхлэгчдийн хамтын ажиллагаа өргөжих боломж бүрдэх юм. Үүнээс гадна аялал
жуулчлал, соёл урлаг, боловсрол, хүмүүнлэг зэрэг бусад салбарын хамтын
ажиллагаа ч хөгжих боломжтой хэмээн БНКазУ-ын Элчин сайдын яамны Элчин зөвлөх
Айдар Абишев дурдлаа.
1997 онд байгуулсан “СКАТ” компани 1355 гаруй ажилтан, 21 агаарын
хөлөгтэй бөгөөд дотоодын 16 хот, дэлхийн 20 орчим орон руу нислэг үйлддэг байна. Тус компани
өнгөрсөн онд 2.2 сая зорчигч тээвэрлэсэн бол энэ жил 2.5 сая болгох зорилт
тавин ажиллаж байгаа юм.
