Ulaanbaatar
ХОВД: Өвөлжилт хүндэрсэн сумдад өвс, тэжээлийн дэмжлэг олгоно
ОРОН НУТГИЙН МЭДЭЭ | ХОВД
Ховд /МОНЦАМЭ/. Ховд аймгийн Онцгой комисс энэ
сарын 24-нд хуралдаж, өвөлжилт хүндэрч байгаа сумдын
малчдад өвс, тэжээл, хүнсний багц олгох тухай асуудлыг хэлэлцлээ.
Ховд
аймгийн хэмжээнд нийт 11 суманд цас ихтэй байгаагийн улмаас өвөлжилт хүндрэх эрсдэл их байна. Иймд сум орон нутгаас ирсэн хүсэлтийн дагуу нийт суманд улсын
Онцгой комиссоос олгосон өвс, тэжээлийн дэмжлэг үзүүлэх шийдвэр гаргажээ.
Өөрөөр хэлбэл, улсын Онцгой комиссоос Ховд аймагт
770 гаруй тонн
өвс, тэжээлийн дэмжлэг үзүүлсэн. Үүнийг эрсдэлийн нөхцөл байдлын судалгааг үндэслэн
50 хувийн хөнгөлөлттэй үнээр малчдад олгох аж.
Мэргэжлийн байгууллагууд цаашид өвөлжилт хүндэрвэл аймаг, сумын нөөцөөс дэмжлэг үзүүлэхээр төлөвлөж байна. Мөн
отор нүүдлээр яваа болон хүнс,
тэжээлийн дэмжлэг шаардлагатай байгаа айл өрх, малчдад хүнсний багц олгохоор
төлөвлөж үнэлгээ, судалгаа хийж буй.
