Ulaanbaatar
Г.Болор-Эрдэнэ Монголын анхны Паралимпын мөнгөн медальт тамирчин боллоо
МОНГОЛЫН МЭДЭЭ | СПОРТ
Улаанбаатар, 2024 оны наймдугаар сарын 31 /МОНЦАМЭ/. “Парис-2024” зуны паралимпын Таеквондогийн эрэгтэйчүүдийн 63 кг-ын жинд дэлхийн таван удаагийн аварга, Ази тивийн таван алтан медальт, Монгол Улсын гавьяат тамирчин Г.Болор-Эрдэнэ мөнгөн медаль хүртлээ.
Тэрээр аваргын төлөөх тулаанд Туркийн тамирчинтай өрсөлдөж
үндсэн цагт 7-7 гэсэн оноогоор тэнцэж, нэмэлт цагт ялагдаж, тус наадмын
Монголын багийн хоёр дахь медальтан болсон юм.
Монгол Улсын баг нэг алт, нэг мөнгөн медаль хүртсэн байдлаар “Парис-2024” паралимпын наадамд оролцогч 168 орноос одоогоор 19 дүгээр байрт жагсаж байна.
Г.Болор-Эрдэнэ паралимпын наадмын Монголын багийн зургаа дахь медалийг хүртэж байгааг Монголын Үндэсний Олимпын хороо мэдээлжээ.
Монголчуудын паралимпын наадмын амжилтаас дурдвал, "Бээжин-2008" наадмаас Д.Баатаржав байт харваагаар алт, "Рио-2016" наадмаас Б.Ууганхүү жүдо бөхөөр, Э.Содномпилжээ пауэрлифтингээр хүрэл, "Токио-2020" наадмаас Э.Содномпилжээ алт, "Парис-2024" наадмаас У.Сүрэнжав таэквондогоор алтан медалийг тус тус хүртээд буй юм. Гэрэл зургийг Ж. Адилбиш
