Ulaanbaatar
Автотээврийн тухай хуулийг шинэчилнэ
МОНГОЛЫН МЭДЭЭ
Засгийн газрын ээлжит хуралдаанаар Автотээврийн тухай хуулийн төслийн шинэчилсэн найруулгын үзэл баримтлалыг хэлэлцэж дэмжсэн талаар Ерөнхий сайдын хэвлэлийн төлөөлөгч Ц.Мөнхтөр мэдээллээ.
1999 онд Автотээврийн хууль баталснаас хойш 15 удаа нэмэлт, өөрчлөлт оруулсан байна. Олон удаа нэмэлт, өөрчлөлт оруулсан нь тус хуулийн үзэл баримтлалыг алдагдуулж, цаашид хэвийн мөрдөгдөхөд хүндрэлтэй болсон хэмээн Засгийн газар үзжээ.
2014 онд зорчигч тээврийн 98 хувь, ачаа тээврийн 68 хувийг автотээврийн хэрэгслээр гүйцэтгэсэн байна. Автотээврийн хэрэгслийн тоо сүүлийн 20 жилийн хугацаанд 5 дахин өссөн бөгөөд 2014 онд Монгол Улсад 740 гаруй мянган тээврийн хэрэгсэл тоологджээ. Үүнээс 430 гаруй мянган тээврийн хэрэгсэл нь хувийн автомашин байгаа аж.
2012 оноос 21 аймгийг нийслэлтэй автозамаар холбох бүтээн байгуулалтын ажил эхэлсэн. Үүнтэй холбогдуулан орон нутгийн автотээврийн хэрэгслийн тоо огцом өсч байна. Мөн шатахуун хангамж зэрэг автотээвэртэй холбоотой олон асуудал үүсч байгаа тул Автотээврийн хуулийг нэн яаралтай хэлэлцэж батлах шаардлага тулгарсан байна. Засгийн газрын хуралдаанаар уг хуулийн төслийг нэн даруй боловсруулахыг Зам тээврийн сайдад үүрэг болгов.
Ч.Ариунболд
Гэрэл зургийг Б.Чадраабал
