Ulaanbaatar
“Чоно” хочит шинэ Хабиб – Хамзат Чимаев
ДЭЛХИЙН МЭДЭЭ | СПОРТ
МОСКВА./TASS/. Чеченьд төрсөн
тулаанч Хамзат Чимаев холимог тулааны UFC холбооны шинэ дээд амжилтыг
тогтоолоо. Шведийн нэрийн өмнөөс тэмцээнд оролцдог тэрбээр 10-хан хоногийн
дотор өөр өөр жинд тулаан хийхдээ өрсөлдөгчдөө хугацаанаас өмнө ялжээ.
Ингэснээр Хамзат шинэ од болон
гялалзаж эхэлж байгаа тухай UFC холбооны ерөнхийлөгч Дэйна Уайт ярьсан бол
тулааны урлагийн хөгжөөн дэмжигчид түүнийг Хабиб Нурмагомедовтой зүйрлэх болсон
байна.
Чимаевын хувьд, Нурмагомедовын менежер
Али Абдель-Азизтай гэрээ байгуулсан бөгөөд үүний дараахан нэгэн тулаанд орлох тамирчнаар
оролцох санал түүнд иржээ. Уэльсийн тамирчин Жон Филиппстэй тулалдсан тэрбээр
124 удаа цохилт хийсэн бол ердөө хоёрхон цохилт алджээ. Энэ тулааны дараа Хамзат UFC холбооны
ерөнхийлөгчид хандан ойрын үед дахин нэг тулаан хийхэд бэлэн гэдгээ мэдэгдсэн
байна.
Ингээд 10 хоногийн дараа Умард
Ирландын тамирчин Риза Маккитай хийсэн тулааны явцад тэрбээр 68 цохилт хийхдээ
ганц ч цохилт алдаагүй ба хоёр тулаанд ялсныхаа төлөө 100 мянган
долларын шагнал авчээ. Улмаар UFC холбооны аварга асан Конор Макгрегорыг
тулаанд нэг бус удаа дуудсан боловч Ирландын тамирчнаас хариу ирээгүй байна.
Сүүлийн хоёрхон
долоо хоногийн хугацаанд шинэ од Чимаевыг Инстаграмм сүлжээнд 300 мянга гаруй хүн дагах болжээ.
