Ulaanbaatar
Израил гуравдугаар сараас хилээ нээж эхэлнэ
ДЭЛХИЙН МЭДЭЭ | НИЙГЭМ
ТЕЛЬ-АВИВ. /RIA Novosti/. Израил улс ирэх гуравдугаар сараас олон улсын аялал жуулчлалыг сэргээхээр төлөвлөж байна гэж тус улсын Аялал жуулчлалын яамны хэвлэлийн алба мэдээлэв.
"Вакцинжуулалтын хоёр үе шатанд хамрагдаж, "ногоон паспорт" авсан иргэд нисэхээс өмнө болон буусныхаа дараа тусгаарлагдахгүй, шинжилгээ хийлгүйгээр аялах боломжтой" гэж мэдээлэлд дурджээ.
Тус улс хилээ нээхтэй холбоотой асуудлаар Кипртэй хэдийнэ тохиролцоонд хүрчихсэн байгаа бөгөөд хоёрдугаар сарын 8-ны даваа гарагт Грекийн Ерөнхий сайд Кириакос Мицотакис Израилд айлчилж, тус улстай аялал жуулчлалаа хэрхэн үргэлжлүүлэх талаар хэлэлцэх төлөвтэй байна. Аялал жуулчлалыг сэргээх хэлэлцээг мөн Серби, Сейшелийн арлууд, Румын, Гүрж зэрэг оронтой хийж байгаа аж.
Израил улс вакцинжуулалтын хурдацаар дэлхийд тэргүүлж байгаа юм. Хоёрдугаар сарын 4-ний байдлаар тус улсын нийт хүн амын 37 хувь нь коронавирусний вакцины эхний тунг, 21 орчим хувь нь хоёр дахь тунг хийлгэжээ.
