Ulaanbaatar
Сургуулийн нийгмийн ажилтан, сэтгэл зүйч нарыг чадавхжууллаа
ОРОН НУТГИЙН МЭДЭЭ | ХОВД
Ховд /МОНЦАМЭ/. Ховдод “Орон нутаг дахь хүүхэд хамгаалал” сэдэвт хэлэлцүүлэг болж байна.
Өөрөөр хэлбэл, Боловсрол, шинжлэх ухааны яам, НҮБ-ын
Хүүхдийн сантай хамтран 2020 онд “Хүүхдийн нийгэм-сэтгэл зүйн асуудал, эрсдэлийг
илрүүлэх судалгаа” хийжээ.
Сурагчдын 76.8 хувь нь
сэтгэл зовнилтой байна, 6-13 насны хүүхдүүдийн стресс бухимдал хэвийн
үзүүлэлтээс өндөр бөгөөд сурагчдын дийлэнх нь коронавирусний халдварын тархалт, сурлагаар хоцрогдлоос айж байгаа тул энэ чиглэлд дэмжлэг туслалцаа үзүүлэх
шаардлагатай байна гэж дээрх судалгаанд
тусгасан байна.
Иймээс эцэг эх, олон
нийтийн дунд хүүхэд хүмүүжлийн эерэг аргад сургах үйл ажиллагааг эрчимжүүлэх, хүүхдэд
хамгийн ойрхон үйлчилгээ үзүүлдэг хүүхэд хамгааллын багийн гишүүнийг
чадавхжуулах зорилгоор дээрх хэлэлцүүлгийг энэ сарын 24, 25-ны өдөр Ховд аймагт
зохион байгуулж буй.
Энэ удаагийн хэлэлцүүлэгт
сум, сургуулийн нийгмийн ажилтан, сэтгэл зүйч нарын төлөөлөл 47 хүн оролцож,
сурагчдад тулгамдаж буй асуудлыг шийдвэрлэхэд хамтран ажиллах, анги удирдсан
багшаар дамжуулан эцэг эхийн боловсролыг дээшлүүлэх чиглэлээр шинэ мэдлэг,
мэдээлэлтэй болж байгаа аж.
Мөн боловсролын салбар
дахь хүүхэд хамгааллын нөхцөл байдал, тулгамдаж буй асуудал, энэ чиглэлд сургуулийн хэмжээнд
санаачлан хэрэгжүүлж буй сайн туршлагуудын талаар ярилцаж байна.
