Ulaanbaatar
СЭЛЭНГЭ: Нөхөх олговорт 2 тэрбум 965 сая төгрөгийг олгуулжээ
ОРОН НУТГИЙН МЭДЭЭ | СЭЛЭНГЭ
Сүхбаатар /МОНЦАМЭ/. Монгол
Улсад улс төрийн хэлмэгдүүлэлт нь нийгмийн бүхий л давхарга, олон түмнийг
нийтээр нь хамарч эхэлсэн 1937 оны 9 дүгээр сарын 10-ны өдрөөр төлөөлүүлэн жил
бүрийн энэ өдрийг “Улс төрийн хэлмэгдэгчдийн дурсгалыг хүндэтгэх өдөр” болгон
улс орон даяар тэмдэглэж байх тухай УИХ-ын тогтоолын дагуу энэхүү өдрийг 28 дахь жилдээ хүндэтгэн өнгөрүүлж
байна.
Улс төрийн хилс хэрэгт
хэлмэгдэгчдийг цагаатгах, тэдэнд нөхөх олговор олгох тухай хуульд 2018 оны нэгдүгээр сарын 12-ны өдөр УИХ-аас нэмэлт өөрчлөлт оруулснаар улс төрийн хилс
хэрэгт холбогдуулан цаазаар авах ялаар шийтгүүлсэн хэлмэгдэгчдийн эхнэр /нөхөр/
эсхүл хэлмэгдэгчийн төрсөн болон үрчилж авсан хүүхэд, хэлмэгдэгчийг нас
барснаас хойш 10 сараас илүүгүй хугацааны дотор төрсөн хүүхдэд 80.0 сая төгрөг,
мөн хорих ялаар шийтгүүлсэн дээрх хүмүүст 40.0 сая төгрөгийн нөхөх олговор тус
тус олгожээ.
Өнөөдрийн байдлаар хуулийн
дээрх заалтын хүрээнд Сэлэнгэ аймгийн харьяат 64 нэхэмжлэгчдэд нөхөх олговорт 2
тэрбум 965 сая төгрөгийг олгуулсан аж.
Үүнийг он тус бүрээр задлан
танилцуулбал, 2019 онд 6 нэхэмжлэгчид 281. 0 сая, 2020 онд 34 нэхэмжлэгчид
1.683.0 сая, 2021 онд 3 нэхэмжлэгчид 120.0 сая, 2022 онд 11 нэхэмжлэгчид 401
сая, 2023 онд 10 нэхэмжлэгчид 480 сая төгрөгийн нөхөх олговор олгогдоод байгаа
аж.
Харин аймгаас шүүхийн шийдвэр
нь гарч Цагаатгах ажлыг удирдан зохион байгуулах улсын комисст уламжлагдсан 4
нэхэмжлэгчийн 161 сая төгрөгийн нөхөх олговор хүлээгдэж байгаа хэмээн Сэлэнгэ
аймгийн цагаатгах ажлыг удирдан зохион байгуулах салбар комиссоос мэдээллээ.
Энэхүү өдрийг тохиолдуулан тус
салбар комиссоос Сүхбаатар сумын ИТХ-тай хамтран хэлмэгдэгсдийн хойчийн буянд
зориулан “Төгс баясгалант номын хүрд хийд”-д буяны ном хуруулах.
Мөн хэлмэгдэгчдийн дурсгалд зориулсан “Ногоон төгөл”-д тарьсан модоо усалж тордох, хэлмэгдэгчдийн үр хүүхэд төрөл төрөгсдийг хүлээн авч уулзан санал хүсэлтийг нь сонсох зэрэг үйл ажиллагааг зохион байгуулжээ.
