Улаанбаатар
Хайрхандулааны хүн эмнэлгийн автомашиныг яаралтай шийдэх шаардлагатай гэж үзлээ
ОРОН НУТГИЙН МЭДЭЭ | ӨВӨРХАНГАЙУлсын онцгой комиссын ажлын хэсэг Өвөрхангайд ажиллалаа
Монгол Улсын Засгийн газар, Ерөнхий сайдын өгсөн үүрэг, чиглэлийн дагуу Шадар сайд, Улсын онцгой комиссын шуурхай ажлын хэсэг баруун болон төвийн бүсийн, зүүн болон говийн бүсийн чиглэлд ажиллаж байна.
Улсын онцгой комиссын Нарийн бичгийн дарга, хурандаа М.Энх-Амараар ахлуулсан ажлын хэсгийнхэн уржигдар Өвөрхангай аймгийн Есөнзүйл, Өлзийт, Бүрд, Хархорин, Арвайхээр, Хайрхандулаан, Нарийнтээл, Тарагт сумдаар ажиллаж, өвөлжилтийн нөхцөл байдалтай танилцсан юм.
Өвөрхангай аймгийн хувьд Монгол Улсын Засгийн газрын 292 дугаар тогтоолын дагуу өвөлжилтийн бэлтгэл ажлыг бүрэн хангасан бөгөөд 27700 тн өвс, 5200 тн гар тэжээл, 520 тн ногоон тэжээл, 345 тн үйлдвэрийн тэжээл, 9220 тн хужир шүү бэлтгэжээ. Мөн аймгийн хэмжээнд уурын зуухнуудын засвар үйлчилгээг бүрэн хийсэн ба нүүрс татан авалт 30 хувьтай байна. Баянтээгийн нүүрсний уурхайн хөрс хуулалт бүрэн хийгдсэн, нүүрсний чанар сайн байгаа юм. “АЗЗА” ТӨХК-ийн машин техник, хүн хүчний бэлэн байдлыг хангуулж, цаг агаарын улмаас цасанд хаагддаг АО301-АО302 улсын чанартай авто замын дагуу 2 ажлын хэсэг гарч ажиллаж байна.
Аймгийн Засаг дарга, Онцгой комиссын дарга Д.Тогтохсүрэн “Энэ жил манай аймагт өвөлжилт өнөтэй сайхан байна. Аймгийн хэмжээнд өвөлжилтийн бэлтгэл ажлыг сайн хангасан. Бэрхшээлтэй нэг асуудал нь Хайрхандулаан сумын хүн эмнэлэг шуурхай албаны үйлчилгээ явуулах түргэн тусламжийн автомашин бүрэн зогссон учраас нөхцөл байдал хүнд байна. Дөнгөж сая дуудлаганд гарах автомашингүй болохоор нь аймгийн Засаг даргын Тамгын газрын машиныг Хайрхандулаан сум руу хөдөлгөлөө” гэсэн юм.
Аймгийн хэмжээнд 12 дугаар сарын 16-ны өдрийн байдлаар алслагдмал газарт амьдардаг төрөх насны 33 жирэмсэн эхийг төв, суурин газарт байрлуулж, эхийн эндэгдэлгүй байгаа гэж Эрүүл мэндийн газрын дарга хэллээ.
Ажлын хэсгийнхэн орон нутагт ажиллах үеэр Бүрд сумын 2 дугаар багийн иргэдтэй уулзсан юм. Малчид ”Манай нутагт энэ жил үнэхээр сайхан өвөл болж байна. Малын амны устай, малчид ч өөрсдөө өвс, тэжээлээ боломжийнхоо хэмжээнд сайтар бэлтгэлээ. Харин баруун аймгуудын зарим нутгаар өвөлжилт их хүнд байгаа гэж сонслоо. Эдгээр малчдад Та бүхэн минь сайн тусалж, тодорхой арга хэмжээг авч өгөөрэй ” гэж өөр аймгийн малчиддаа санаа зовниж хэлж байсан юм.
Улсын онцгой комиссын Ажлын хэсэг Өвөрхангай аймгийн өвөлжилтийн нөхцөл байдалтай танилцаад эхний ээлжинд Хайрхандулаан сумын хүн эмнэлгийн автомашины асуудлыг зайлшгүй шаардлагатай гэж үзлээ.
Б.Батчимэг
