Улаанбаатар
“Аялал жуулчлалын байр сууцны үйл ажиллагааны журам”-ын төслийг боловсруулжээ
ОРОН НУТГИЙН МЭДЭЭ | ОРХОН
Орхон /МОНЦАМЭ/ Амралтын газар, зочид буудал, дэн буудал, нийтийн буудал, авто буудлын үйл ажиллагааг “Аялал жуулчлалын байр сууцны үйл ажиллагаа” хэмээн томьёолж байна.
Үүнд амралтын газар нь байгалийн
нөөцөд түшиглэсэн үйлчилгээ бол зочид буудал нь байр, хоолны үйлчилгээ үзүүлэх
нэмэлт тоноглолтой, тусгай төрөлжсөн албад бүхий үйлчилгээний байгууламж, дэн
буудал нь төв суурин газарт байр, өглөөний хоол бүхий хязгаарлагдмал
үйлчилгээний байгууламж аж. Нийтийн
буудал гэдэгт байр, хоол зэрэг хязгаарлагдмал үйлчилгээтэй, олноор байрлах,
хямд үнэтэй үйлчилгээний байгууламж, авто буудал нь олон улсын болон улсын
чанартай зам дагуу байрласан байр, хоол, тээврийн хэрэгсэл, техникийн засвар
үйлчилгээний байгууламж хэмээн нэрлэнэ гэж “Орхон аймгийн нутаг дэвсгэрт аялал
жуулчлалын байр сууцны үйл ажиллагаа эрхлэх журам”-ын төсөлд дурджээ.
Орхон аймагт 581 ор бүхий 26
зочид буудал, 125 ор бүхий 16 дэн буудал бий. Аялал жуулчлалыг хөгжүүлэхийн
тулд юуны өмнө үйлчилгээний байгууллагын хүртээмж, чанарыг нэмэгдүүлэх хэрэгтэй
байгаа бөгөөд зочид буудал, дэн буудал,
авто буудлын үйл ажиллагаа, үйлчилгээний нөхцөлийн ялгааг илүү тодорхой зааж
өгөх хэрэгтэй байгаа ажээ. Иймд мэргэжлийн байгууллагууд дээрх журмыг
боловсруулж орон нутгийн удирдлагуудад танилцууллаа.
