Улаанбаатар /МОНЦАМЭ/. УИХ-ын Аюулгүй байдал, гадаад бодлогын байнгын хороо /АБГББХ/-ны хуралдаан өнөөдөр болж, Найрсаг харилцаа, иж бүрэн стратегийн түншлэлийн тухай Монгол Улс, ОХУ хоорондын гэрээний төслийг зөвшилцөх асуудлыг хэлэлцлээ.

УИХ-ын дарга ээлжит бус чуулганаар хэлэлцэх асуудлын талаар гаргасан захирамждаа нэмэлт, өөрчлөлт оруулан дээрх асуудлыг ээлжит бус чуулганаар хэлэлцэх асуудлын дараалалд оруулсан гэдгийг хуралдааны эхэнд Байнгын хорооны дарга Т.Аюурсайхан онцолсон.

Тэрбээр, УИХ-ын чуулганы хуралдааны дэгийн тухай хуульд “Хуулиар УИХ-аас батлах хугацааг нь тусгайлан заасан асуудлыг Үндсэн хуульд оруулах нэмэлт, өөрчлөлтийн төслийн хэлэлцүүлгийн дундуур хэлэлцэн шийдвэрлэж болно” хэмээн заасныг дурдаад, дээрх гэрээний төсөлд ОХУ-ын Ерөнхийлөгч В.Путины Монгол Улсад хийх айлчлалын үеэр буюу ирэх сарын 03-нд гарын үсэг зурахаар хоёр улс ноот бичиг солилцон хугацааг тогтоосон хэмээсэн юм.

Гэрээний төслийн талаар Гадаад харилцааны сайд Д.Цогтбаатар танилцуулахдаа, "Манай улс ОХУ-тай Найрсаг харилцаа, хамтын ажиллагааны тухай гэрээг 1993 онд, мөн стратегийн түншлэлийг хөгжүүлэх тухай тунхаглалыг 2009 онд байгуулсан байна. Манай улс БНХАУ-тай Иж бүрэн стратегийн түншлэлийн харилцааг 2014 онд тогтоосон бөгөөд ОХУ-тай хөгжиж буй харилцааны өнөөгийн түвшин болон Монгол Улсын гадаад бодлогын үзэл баримтлалын дагуу хоёр хөрштэй тэнцвэртэй харилцаа тогтоох үүднээс ОХУ-тай дээрх баримт бичгүүдийг шинэчлэн байгуулж, Иж бүрэн стратегийн түншлэлийн харилцаа тогтоохоор тохиролцоод байна" гэв.

Энэхүү гэрээнд ОХУ-ын Ерөнхийлөгч В.Путины ирэх сарын эхээр Монгол Улсад хийх төрийн айлчлалын үеэр хоёр улсын төрийн тэргүүнүүд гарын үсэг зурахаар төлөвлөжээ. Гэрээний төслийг Засгийн газрын энэ сарын 28-ны хуралдаанаар хэлэлцэн дэмжсэн бөгөөд Олон улсын гэрээний тухай хуулийн ес дүгээр зүйлийн дөрөв дэх хэсэг болон 11 дүгээр зүйлийн нэг дэх хэсэгт заасны дагуу УИХ-ын АБГББХ-той зөвшилцөхөөр ирүүлээд буйг Гадаад харилцааны сайд танилцуулгадаа дурдав.

УИХ-ын гишүүн С.Батболд, дээрх баримт бичгүүдийг шинэчлэн байгуулснаар агуулгын хувьд ямар өөрчлөлт орж байгааг тодруулаад, гэрээний хамт хоёр улсын харилцаанд үр өгөөж авчрах өөр баримт бичиг байгуулагдах эсэхийг асуусан юм.

Гадаад харилцааны сайд Д.Цогтбаатарын хариулснаар, гадаад бодлогын үзэл баримтлалдаа нийцүүлэхийн тулд Стратегийн түншлэлийн харилцааг Иж бүрэн стратегийн түншлэлийн харилцаа хэмээн томьёолж шат ахиулж буй бөгөөд Найрсаг харилцаа, хамтын ажиллагааны хэлэлцээрийг үүнтэй холбогдуулан өөрчилж буй аж.

Стратегийн түншлэлийг өргөтгөж буй учир агуулгын өөрчлөлт орохоос гадна инноваци, мэдээллийн технологийн салбарт хамтран ажиллах, соёлын хамтын ажиллагааг нэмэгдүүлэх гэх мэт хэд хэдэн заалтууд нэмэгдэж байгаа юм байна. Энэхүү суурь хэлэлцээрийн дараа олон хэлэлцээрүүд байгуулагдах бөгөөд энэ удаагийн айлчлалын үеэр 11 гэрээ, хэлэлцээр байгуулагдахаар яригдаж байгаагийн тав нь байгууллага хоорондын хэлэлцээр байгааг тэмдэглэв.

Хэлэлцэж буй асуудалтай холбогдуулан УИХ-ын гишүүд асуулт асууж, хариулт авсаны дараа Найрсаг харилцаа, иж бүрэн стратегийн түншлэлийн тухай Монгол Улс ОХУ хоорондын гэрээний төсөлд гарын үсэг зурахыг зөвшөөрөх саналын томьёоллоор санал хураахад, хуралдаанд оролцсон гишүүдийн олонх дэмжлээ хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ.