Улаанбаатар
Жирэмсний хяналт, нөхөн үржихүйн эрүүл мэндийн нэг цэгийн үйлчилгээ үзүүлж эхлэв
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Нийслэлийн Эрүүл мэндийн газраас 2019 оныг “Эх хүүхдийг тусламж, үйлчилгээг дэмжих жил” болгон зарласан. Энэ хүрээнд баталсан “Жирэмсний хяналт, нөхөн үржихүйн эрүүл мэндийн цогц тусламж, үйлчилгээ үзүүлэх нэг цэгийн үйлчилгээний журам”-ыг хэрэгжүүлэн ажиллахыг дүүргийн Эрүүл мэндийн төвүүдэд үүрэг болгосон юм.
Энэ дагуу НЭМГ-ын ажлын баг нийслэлийн найман дүүрэгт хяналт,
үнэлгээ хийсэн бөгөөд Эрүүл мэндийн төвийн удирдлага, үйлчлүүлэгч болон эх
барих, эмэгтэйчүүдийн эмч, эмнэлгийн мэргэжилтнүүдтэй уулзаж, мэргэжил арга
зүйн зөвлөгөө өгч ажиллалаа.
Дүүргийн Эрүүл мэндийн төвүүдэд зохион байгуулж буй “Жирэмсний
хяналт, нөхөн үржихүйн эрүүл мэндийн нэг цэгийн үйлчилгээ”-ний хүрээнд эмэгтэйчүүд,
жирэмсний дотрын кабинетыг бие даан ажиллуулж ЭХО болон лабораторийн шинжилгээг
нэг цэгт төвлөрүүлжээ.
Ингэснээр жирэмсэн эхчүүдийн шинжилгээ өгөх хугацаа 2-5
хоногоор багасаж, эх нярайн үндсэн үзүүлэлт сайжирсан нааштай үр дүн гарч эхлээд
байна. Түүнчлэн жирэмсэн эх, эмэгтэйчүүдэд эрүүл мэндийн тусламж, үйлчилгээг нэг
дороос хүлээгдэл чирэгдэлгүй, чанар хүртээмжтэй, ээлтэй орчинд цогц байдлаар үзүүлэх
нөхцөл бүрдэж байна гэж НЭМГ
мэдээлэв.
