Чойбалсангийн цахилгаан станцыг өргөтгөх ажил эхэллээ

Монголын мэдээ | Улс төр
ariunbold@montsame.mn
2019-11-08 16:16:19

Улаанбаатар /МОНЦАМЭ/. Монгол Улсын Ерөнхий сайд У.Хүрэлсүх Чойбалсангийн цахилгаан станцын хүчин чадлыг 50 МВт-аар өргөтгөх ажлын нээлтэд оролцов. 



Зүүн бүсэд уул уурхайн салбар эрчимтэй хөгжиж, үүнийг даган өсөж буй эрчим хүчний хэрэглээг “Дорнод бүсийн эрчим хүчний систем” ТӨХК бүрэн хүчин чадлаараа ажиллаад ч хангаж чадахгүй байна. Эрчим хүчний хангамжаас шалтгаалж зарим аж ахуйн нэгж үйл ажиллагаагаа өргөжүүлж чадахгүй байгаа юм. 1967 онд 36 МВт-ын хүчин чадалтайгаар байгуулсан цахилгааны станцыг өргөтгөх талаар 10 гаруй жил, хэд хэдэн Засгийн газар дамжин ярьсан ч ажил хэрэг бололгүй өнөөг хүрээд байлаа. Газрын тосны олборлолт, боловсруулалт болон уул уурхайн салбарыг тогтвортой хөгжүүлэх, зүүн бүсэд томоохон бүтээн байгуулалт хийх зорилгоор цахилгаан станцыг өргөтгөн, хүчин чадлыг нь нэмэх ажил ийнхүү эхэлж байгааг Монгол Улсын Ерөнхий сайд У.Хүрэлсүх тэмдэглэв.


Станцыг 18 сарын хугацаанд багтан өргөтгөх бөгөөд Хөгжлийн банкны зээлээр санхүүжүүлэх юм.


Алтан гадас одонт “Дорнод бүсийн эрчим хүчний систем” ТӨХК нь Дорнод, Сүхбаатар аймгийн 36 сум, суурин газрын 25 мянга орчим өрх, 3100 гаруй аж ахуйн нэгж, албан байгууллага, уул уурхайн 13 ордын баяжуулах, олборлох үйлдвэрийг цахилгаан эрчим хүчээр, Чойбалсан хотын 800 гаруй аж ахуйн нэгж, 6000 гаруй өрхийг дулааны эрчим хүчээр хангаж байна.

Холбоотой мэдээ