Улаанбаатар
Ачилтын компаниуд иргэдийн гар утсанд мэдээлдэг боллоо
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Нийслэлийн Зам тээврийн асуудал хариуцсан төслүүдийн удирдагч Б.Отгонсүхээр ахлуулсан ажлын баг Замын хөдөлгөөн удирдлагын төвийн Ачиж журамлах албанд өнөөдөр хяналт шалгалт хийлээ.
Нийслэлийн удирдах ажилтнуудын шуурхай зөвлөгөөний үеэр
хотын Захирагч С.Амарсайхан автомашин ачилтын компаниудын үйл ажиллагааг зохих
журмын дагуу цэгцлэхийг холбогдох албаныханд үүрэг болгосон билээ.
“Тээврийн хэрэгслийг зөөж шилжүүлэх, түр саатуулах
журам”-аар ачилтын компаниудын үйл ажиллагааг зохицуулж байгаа ч иргэдийн автомашиныг хаана журамласан нь
тодорхой бус, ачилтын компаниуд тухайн эзэнд нь утасдаж мэдэгддэггүй, цагдаагийн
шийдвэр, албан бичгээ үзүүлдэггүй гэх мэт гомдол өнөөдрийг хүртэл гарсаар
байгаа юм. Харин өнөөдрөөс эхэлж автомашин ачилтын компаниуд чанга яригчаар
сануулж, журамласан зогсоолын мэдээллийг иргэдийн гар утсанд мессэж илгээдэг
боллоо.
Нийслэлийн Зам тээврийн асуудал хариуцсан төслүүдийн
удирдагч Б.Отгонсүх, “2015
онд баталсан “Тээврийн хэрэгслийг зөөж шилжүүлэх, түр саатуулах журам”-ыг
өнгөрсөн оны 6 дугаар сард шинэчилсэн. Ингэхдээ жолоочид мэдэгдэхгүйгээр шууд
ачдаг байсныг болиулж, гурван удаа чанга яригчаар тухайн машины улсын дугаарыг
дуудах шинэ заалт нэмэгдэж орсон. Дүрэм журмаа биелүүлээгүй дөрвөн компанийн
үйл ажиллагааг зогсоосон. Цаашид ч иргэдэд мэдээлдэггүй дүрэм журмаа зөрчсөн
компаниудад хариуцлага тооцно. Иргэдээс ирүүлсэн өргөдөл гомдлын ихэнх нь ямар
дүрэм зөрчиж, автомашинаа хаана журамлуулснаа мэдэхгүй ийш тийш залгаж, цаг
хугацаа алддаг учраас одоо гар утсанд нь мэдээлэл өгдөг боллоо” гэв.
Ажлын баг энэ сарын 10-ныг хүртэл ачилтын компаниудад хяналт шалгалт хийх юм. Иргэд автомашинаа
ачуулаад эвдрэл гэмтэл гарсан тохиолдолд нийслэлийн Автозамын хөгжлийн газарт
хандаж шийдвэрлүүлэх боломжтой аж. Улаанбаатар хотод ачилт буулгалтын гэрээтэй
15 аж ахуйн нэгж үйл ажиллагаа явуулж байгаа бөгөөд Нийслэлийн Авто замын
хөгжлийн газарт өнгөрсөн онд 350 гаруй өргөдөл гомдол ирсний дийлэнх нь
мэдээлэл өгөхгүй тээврийн хэрэгслийг зөөж шилжүүлдэг тухай байдаг байна.
