Улаанбаатар
Б.Ариунбаяр, Н.Хэрлэн нар мөсөнд авиралтын тивийн аварга болов
МОНГОЛЫН МЭДЭЭ | СПОРТ
Улаанбаатар /МОНЦАМЭ/. БНСУ-д болсон мөсөнд авиралтын Дэлхийн цомын аварга шалгаруулах цуврал тэмцээнийг Ази тивийн АШТ-тэй хамтатган зохион байгуулж, Монголын баг тамирчид хоёр алт, нэг хүрэл медаль хүртэв.
Тэмцээнд манай улсаас Олон улсын уулчдын холбооны дэд Ерөнхийлөгч, Монголын уулчдын үндэсний холбооны тэмцээн хариуцсан дэд Ерөнхийлөгч Б.Золжаргалын удирдлагад ОУХМ Н.Хэрлэн, спортын мастер Б.Ариунбаяр, Ч.Мандахбаяр, спортын дэд мастер Д.Отгонхүү, Д.Баасандорж, нэгдүгээр зэрэгтэй Ж.Сэдэд нар оролцсон юм.
Тивийн аварга шалгаруулах тэмцээний эрэгтэйчүүдийн хурдны төрөлд ОУХМ Н.Хэрлэн 17.45 оноогоор, эмэгтэйчүүдийн хурдны төрөлд спортын мастер Б.Ариунбаяр 24.06 оноогоор түрүүлж, Ази тивийн аварга болов. Спортын дэд мастер Д.Баасандорж 20.95 оноогоор хүрэл медаль хүртсэн бол спортын мастер Д.Отгонхүү VIII, спортын мастер Ч.Мандахбаяр 16 дугаар байрт шалгарсан байна.
