“The Hu” хамтлаг Ирланд улсад аялан тоглолоо

Монголын мэдээ | Соёл урлаг
183@montsame.mn
2020-02-17 17:32:50

Улаанбаатар /МОНЦАМЭ/. The Hu хамтлаг Европ дахь аялан тоглолтоо үргэлжлүүлсээр байна. Өнгөрсөн амралтын өдрүүдэд Ирланд улсад тоглолтоо  хийжээ.

 "Бид анх “Yuve Yuve Yu” дууныхаа клипийг хийхийн тулд Монгол орны баруун нутгаар 5,000 гаруй километр аялсан бол одоо дэлхийд хэчнээн км явснаа тоолоогүй байна. Уран бүтээл маань дэлхийн хүмүүст хүрч буйд туйлын их баяртай байгаа. “The Hu” хамтлаг “Better Noise Music” компанид харьяалагддаг. Компаниас бидэнд хамтран ажиллах санал тавьсан нь бидний хувьд нэр төрийн хэрэг болсон. Үзэсгэлэнт байгаль, U2, Конор МакГрегор, Жеймисон, Гиннесийн ном гээд олон зүйл нь анхаарал татдаг Ирланд улсад тоглолтоо хийж байгаадаа баяртай байна" гэж тус хамтлагийнхан тоглолтынхоо дараа ярьсан байна.  

Тус хамтлаг морин хуур, товшуур, цуур, төмөр хуур зэрэг хөгжмийн зэмсгийг бөмбөр, гитар, басс гитартай хослуулан тоглож байгаа нь дэлхийн хөгжим сонирхогчдын анхаарлыг татаж байгаа билээ.  “Хүннү рок” урсгал  Монголын уламжлалт хөгжмийг орчин үеийн рок хөгжимтэй хослуулснаас гадна хамтлагийн нэрээ монгол хэлний “Хүн” гэсэн үгийн язгуур “Хү” гэж нэрлэсэн нь ч гадаадынхны сонирхлыг татдаг байна. Өрнийн соёлыг Дорнын соёлтой холбоод  металл рок урсгалд эрч хүч нэмсэн дуу хоолой, хөөмийг хослуулсан нь ч содон байгаа аж.

Холбоотой мэдээ