Биткойны ханш өсжээ
ДЭЛХИЙН МЭДЭЭ | ЭДИЙН ЗАСАГМОСКВА. /TASS/. Биткойны
дундаж ханш өнгөрсөн хоногт 14 хувиар өсөж, нэг нэгж нь 12.3 мянган ам.доллар
давсныг “Coinmarketcap” цахим хуудасны мэдээлэл харуулжээ. Хамгийн сүүлд 2019 оны
8 дугаар сард биткойны ханш 12.3 мянгын
босгыг давж байсан аж.
Биткойны
зах зээлийн үнэлгээ 227.9 тэрбум ам.долларт хүрчээ. Криптовалютын үнэ 2020 оны
7 дугаар сараас хойш мэдэгдэхүйц өсөж байна.
Биткоин
нь блокчейны технологид үндэслэсэн криптовалютын систем бөгөөд энэ системд
оролцогч дурын хэрэглэгч биткойн “олборлох” /гүйлгээнд гаргах/ боломжтой. Үүний
тулд тооцоолон бодох төхөөрөмжийн тусламжтайгаар блокуудын шинэ сүлжээ бий
болгох ёстой.
Анх
2008 оны 11 дүгээр сарын 1-нд өөрийгөө Satoshi Nakamoto гэж нэрлэсэн нэгэн
программ зохиогч энэ системийг гаргажээ. Гэхдээ биткойныг сүүлийн жилүүдэд л
түгээмэл ашиглах болсон юм. Nakamoto-г хэн ч хараагүй, хэн ч түүнтэй ярилцаж
байгаагүй, биткойны хөгжлийн эхэн үед бусад хөгжүүлэгч түүнтэй цахим шуудангаар
харилцдаг байсан боловч 2011 оноос хойш тэрээр нэг ч и-мэйлд хариу ирүүлээгүй
ор сураггүй алга болжээ. Түүнийг бодит хүн гэдэгт итгэх хүн бараг байдаггүй.
Nakamoto-гийн цаана ямар нэгэн байгууллага эсвэл зохион байгуулалттай бүлэг
хүмүүс байгаа гэж үздэг байна.