ТБХ: Засгийн газрын ажлын хөтөлбөрийг хэлэлцэв

Монголын мэдээ | Улс төр
munkhbaatar@montsame.gov.mn
2020-08-25 18:23:52
@s_munkhbaatar

Улаанбаатар /МОНЦАМЭ/. УИХ-ын Төсвийн байнгын хорооны өнөөдрийн хуралдаанаар, Монгол Улсын Засгийн газрын 2020-2024 оны үйл ажиллагааны хөтөлбөр батлах тухай тогтоолын төслийн анхны хэлэлцүүлгийг хийлээ.


Төслийн анхны хэлэлцүүлэгтэй холбогдуулан асуулт асууж, тодруулга хийх шаардлагагүй хэмээн хуралдаанд оролцсон гишүүд үзсэн. УИХ-ын гишүүн Ц.Даваасүрэн, хөтөлбөрийн төсөлд хүний хөгжлийн асуудал, бүх нийтийн боловсролын чанарыг сайжруулах, боловсролын үнэлэмжийн бүх шатандаа дээшлүүлэхтэй холбоотой асуудлыг ерөнхийлөн тусгасан хэмээн шүүмжиллээ. Олон улсын түвшинд бэлтгэгдсэн өндөр боловсролтой, чадварлаг боловсон хүчнээ улс орны хөгжилд оролцуулж чадахгүй байгааг жишээ дурдан тайлбарласан. Мөн тодорхой чиглэлд экспортыг нэмэгдүүлэх зорилт дэвшүүлэхдээ үүнээс үүдэн дотоод зах зээлд гарах нөлөөллийг зохицуулах арга хэмжээг зэрэгцүүлэн тооцох шаардлагыг хэлж байв. Хөтөлбөрийн төсөл дэх арга хэмжээнд малын эрүүл мэндийн асуудлаар дэвшил гаргах зорилт, арга хэмжээг тусгасан хэмээн үнэлж байгаагаа мөн тэрбээр хэлж байлаа.


Хүнс, хөдөө аж ахуй, хөнгөн үйлдвэрийн яам дээрх хөтөлбөрийн төсөлд 8 зорилтын хүрээнд 38 арга хэмжээ хэрэгжүүлэхээр тусгасан гэдгийг салбарын сайд З.Мэндсайхан хэллээ. Махны экспортын хувьд, нэн тэргүүнд боломжоо тооцож, 25-26 сая толгой малыг эргэлтэд оруулах бөгөөд дотоодын хэрэгцээнд 12-14 сая толгой малын махыг хэрэглэх тооцоо гаргасан байна. Үлдсэн хэмжээгээр экспортлох бололцоо бий ч дотоодын хэрэглээг зохицуулахын тулд урамшууллын тогтолцооны талаарх Ц.Даваасүрэн гишүүний саналыг дэмжиж байгаагаа Хүнс, хөдөө аж ахуй, хөнгөн үйлдвэрийн сайд хэлсэн. Сангийн яамтай энэ чиглэлээр зөвшилцөж, бүртгэлийн системтэй уялдуулж урамшууллын системээ боловсронгуй болгох асуудлыг ярилцсан гэв.


УИХ-ын гишүүн Д.Тогтохсүрэн, Б.Пүрэвдорж нар махны экспортын тооцоолол, өнөөгийн нөхцөл байдлын талаарх дэлгэрэнгүй мэдээллийг тодруулж, хариулт авсан. Хүнсний аюулгүй байдлын зөвлөмжөөр энэ онд 27.9 мянган тонн адууны мах, дулааны аргаар боловсруулсан үхрийн мах 8 мянган тонн, хонины мах 6.6 мянган тонн, ямааны мах 12 мянган тонн гээд нийтдээ 57.7 мянган тонн мах экспортлох тооцоололтой байгааг З.Мэндсайхан мэдээллээ. Төв суурин газрын махны хэрэгцээг хангах нөөцийн хэмжээг 4 мянга орчим тонноор нэмэгдүүлэн 20 мянган тоннд хүргэхээр төлөвлөсөн гэв. Дотоодын мах бэлтгэлийн тоо, хэмжээг нэмэгдүүлсэнтэй холбоотойгоор Сангийн яамтай ярилцан, төсвийн тодотголын төсөлд 4 орчим тэрбум төгрөгийг банкны зээлийн хүүгийн хөнгөлөлтийн санхүүжилэд олгохоор тусгаад байгаа гэлээ. Махны экспортыг нэмэгдүүлэхийн тулд олон улсын түвшинд Монгол Улс мал аж ахуйн эрүүл, тайван бүс гэдгийг баталгаажуулах шаардлага тулгараад байгаа бөгөөд энэ чиглэлд зохих арга хэмжээнүүдийг яаралтай авч хэрэгжүүлж байгаа гэв.


    Төслийн анхны хэлэлцүүлэгтэй холбогдуулан УИХ-ын гишүүн Д.Тогтохсүрэн, Ц.Даваасүрэн, Х.Булгантуяа, Ж.Батсуурь, Ж.Батжаргал, Б.Чойжилсүрэн, Ц.Анандбазар нар үг хэлж, санал гаргав. Ингээд хуралдааны үеэр Байнгын хорооны гишүүдээс гаргасан зарчмын зөрүүтэй саналын томъёолол нэг бүрээр санал хураалт явуулан шийдвэрлэсэн. Ийнхүү “Монгол Улсын Засгийн газрын 2020-2024 оны үйл ажиллагааны хөтөлбөр батлах тухай” Улсын Их Хурлын тогтоолын төслийн анхны хэлэлцүүлгийг хийсэн талаарх санал дүгнэлтээ Төрийн байгуулалтын байнгын хороонд хүргүүлэхээр боллоо.


Үргэлжлүүлэн Монгол Улсыг 2021-2025 онд хөгжүүлэх таван жилийн үндсэн чиглэлийг батлах тухай тогтоолын төслийн анхны хэлэлцүүлгийг хийв. Төслийн анхны хэлэлцүүлэгтэй холбогдуулан асуулт асууж, үг хэлэх шаардлагагүй хэмээн хуралдаанд оролцсон гишүүд үзсэн юм. Иймд гишүүдээс гаргасан зарчмын зөрүүтэй саналын томъёолол тус бүрээр санал хураан шийдвэрлээд, энэ талаарх санал дүгнэлтээ Эдийн засгийн байнгын хороонд хүргүүлэхээр тогтов.


Төсвийн зарим тусгай шаардлагын үйлчлэлийг түр түдгэлзүүлэх тухай хуулийн төслийн анхны хэлэлцүүлгээр хуралдаан үргэлжилэв. Төслийн анхны хэлэлцүүлэгтэй холбогдуулан УИХ-ын гишүүн Ц.Даваасүрэн, Б.Чойжилсүрэн нар асуулт асууж, Сангийн сайдаас хариулт авлаа. Хуульд заасны дагуу Төсвийн зарим тусгай шаардлагын үйлчлэлийг түр түдгэлзүүлэх тухай хуулийн төслийг зүйл бүрээр хэлэлцэв. Төслийн хоёр дугаар зүйлтэй холбогдуулан УИХ-ын гишүүн Б.Чойжилсүрэн зарчмын зөрүүтэй санал гаргаж, шийдвэрлүүлсэн. Ингээд хуулийн төслийн анхны хэлэлцүүлгийг хийсэн талаарх санал дүгнэлтээ чуулганы нэгдсэн хуралдаанд танилцуулахаар боллоо.

Холбоотой мэдээ