“Дархан Нэхий” ХК ISO 9001:2015 стандартыг нэвтрүүллээ

Орон нутагт | Дархан-Уул
174@montsame.mn
2020-09-18 12:17:31

Дархан-Уул /МОНЦАМЭ/. Монголын арьс ширний салбарын чанар, технологийг тодорхойлж, дагуулах чанарыг үйлдвэрлэдэг "Дархан Нэхий" ХК 48 дахь жилдээ үйл ажиллагаа явуулж байна. Малчдын хотноос малын түүхий эдийг хүлээн авч, дэвшилтэт технологиор бүтэн сарын турш боловсруулалт хийн хагас болон гүйцэт боловсруулсан нэхий, савхи, илэг, ширийг дотооддоо оёдлын үйлдвэрүүдэд нийлүүлж кластерийн бодлогыг дэмжин ажиллаж байгаа ба гадаад зах зээлд хагас боловсруулсан хөх ширийг экспортолж Монголын арьс ширийг дэлхийд гаргах үйлсэд хувь нэмрээ оруулж байна.

Дархан Нэхий ХК-ийн үйлдвэрлэлийг явуулдаг гол гурван охин компани болох арьс шир боловсруулалтын Нэхий таннери ХХК, нэхий, савхин дээл, арьс ширэн гутал үйлдвэрлэлийн Нэхий Гармент ХХК, дизайн боловсруулалт, тусгай захиалгын үйлдвэрлэлийн Як трейд ХХК-иуд үйл ажиллагаандаа ISO 9001:2015 олон улсын чанарын менежментийн тогтолцоог нэвтрүүлжээ.

Олон улсын энэхүү стандартыг нэвтрүүлснээр хэрэглэгч таны хэрэгцээнд нийцсэн чанартай бүтээгдэхүүнийг үйлдвэрлэхийн тулд компанийн үйл ажиллагаанд оролцож буй нэгж, ажилтан бүрийн сэтгэл зүрх, мэдлэг ур чадварыг чанарын менежментийн тогтолцоогоор сайжруулан хянаж, дүгнэж, засаж залруулан олон улсын стандартын шаардлагыг ханган үйл ажиллагаагаа удирдан явуулж, хүрээлэн буй байгаль орчин, сонирхогч талууддаа ээлтэй ажиллах зарчмыг эрхэмлэн ажиллаж байгаа аж. 

Малын түүхий эдийг хувцас, гутал буюу эцсийн бүтээгдэхүүн болгох хүртэлх бүх үйлдвэрлэлийг нэг дор хийж буй улсдаа анхдагч, салбартаа тэргүүлэгч компани юм. "Монгол малын буяныг Монголчууддаа хүргэе" уриатай ажиллаж ирсэн бид Монголын малын буяныг дэлхийн зах зээлд гаргах алсын харааг тавьж олон улсын шалгуур, стандартыг үе шаттайгаар нэвтрүүлж хэрэглэгчдийн хэрэгцээ, шаардлагад нийцэх арьс, ширэн бүтээгдэхүүнийг хамгийн боломжит доод үнээр борлуулах зорилго тавин ажиллаж байна.

Холбоотой мэдээ