БНСУ-д африкийн гахайн мялзан өвчний тохиолдол илэрчээ

ДЭЛХИЙН МЭДЭЭ | ЭРҮҮЛ МЭНД
khulan@montsame.gov.mn
2021-05-05 16:44:33

СӨҮЛ. /Yonhap/. БНСУ-д африкийн гахайн мялзан өвчний тохиолдол сүүлийн долоон сарын хугацаанд анх удаа бүртгэгдлээ гэж тус улсын Хөдөө аж ахуй, хүнс, орон нутгийн асуудал эрхэлсэн яам өнөөдөр мэдээлжээ.


Тодруулбал, Ганвон мужийн фермийн гахайнуудаас халдвар илэрсэн тул 401 амьтныг устгахаар болжээ. Мөн Ганвон болон зэргэлдээ оршдог Гёнги, Умард Чунчон муж дахь мал аж ахуйтай холбоотой газрууд руу зорчихыг 48 цагийн турш хориглосон байна.


2019 онд БНСУ-ын хойд нутгийн Гёнги, Ганвон мужийн фермүүдэд гахайн мялзан өвчин тархсаны улмаас урьдчилан сэргийлэх зорилгоор орон даяар 400 мянга орчим гахайг устгалд оруулж байжээ. Тухайн үед нийт 14 фермээс халдвар илэрсэн байна.


Түүнээс хойш орон нутгийн фермүүдэд гахайн мялзан өвчний тохиолдол илрээгүй боловч зэрлэг бодонгоос фермийн гахайнуудад халдварлах магадлалтай байжээ. Тухайлбал, хилийн бүсийн зэрлэг бодонгуудаас халдварын 780 гаруй тохиолдол илэрснээр 3000 гаруй бодонг устгахад хүргэжээ.


Африкийн гахайн мялзан нь хүнд халдварладаггүй боловч гахайнуудын хувьд хувьд үүлдэр, нас харгалзахгүй өвчилж, үхэлд хүргэдэг байна. Одоогоор энэ өвчнийг эмчлэх арга, урьдчилан сэргийлэх вакцин байхгүй байгаа юм. 

Холбоотой мэдээ